भारतीय राजकारणात लालुप्रसाद यादव हे नाव अनेक कारणांसाठी प्रसिद्ध आहे. एक नेता म्हणून उत्स्फुर्त भाषण करण्याची हातोटी आणि विनोदी शैलीत विरोधकांना चिमटे काढण्यात लालुप्रसाद यांचा हात कोणीही धरू शकणार नाही. याच लालुंनी बुधवारी बिहारमधील एका प्रचारसभेदरम्यान पंतप्रधान नरेंद्र मोदींची अशी काही नक्कल केली की उपस्थितांची हसता पुरेवाट झाली. सध्या बिहारमध्ये आगामी विधानसभा निवडणुकांच्या पार्श्वभूमीवर राजकीय वातावरण चांगलेच तापले आहे. त्यामुळे प्रत्येक राजकीय पक्षाकडून अनेक दावे- प्रतिदावे केले जात आहेत. नरेंद्र मोदींनीही काही दिवसांपूर्वी एका प्रचारसभेदरम्यान मोठा गाजावाजा करत बिहारला केंद्राकडून सव्वा लाख कोटींचे विशेष आर्थिक पॅकेज देण्यात आल्याची घोषणा केली होती. यावेळी तुम्हाला किती हवेत.. ५० हजार कोटी, ६० हजार कोटी, ७० हजार कोटी, ८० हजार कोटी की ९० हजार कोटी असे नेहमीच्या पद्धतीने विचारत मोदी यांनी सव्वा लाखांची मदत जाहीर केली होती. मोदींच्या याच वाक्याचा धागा पकडत लालुप्रसाद यादव यांनी अगदी हातवाऱ्यांसकट मोदींची नक्कल करून दाखविली. एका क्षण तर असा आला की, 'अरे मोदी जी ठिक से बोलो, नही तो नस फट जायेगी', असे बोलत लालुंनी मोदींची खिल्ली उडविली.
