मथुरा जिल्ह्यातील बरसाना येथील मंदिरात एका ५० वर्षीय महिलेवर सामूहिक बलात्कार केल्याची घटना समोर आली आहे. मंदिराचा स्वयंपाकी आणि सुरक्षा रक्षकाने बलात्कार केल्याचा आरोप पीडित महिलेने केला आहे. या प्रकरणी तिने पोलिसांत तक्रार दाखल केली आहे. 'हिंदुस्तान टाईम्स'ने याबाबतचे वृत्त दिले आहे. बलात्कारपीडित महिला ही पश्चिम बंगालची आहे. मंदिरात ती झोपली असताना दोघांनी तिच्यावर बलात्कार केल्याची माहिती पोलिसांनी दिली आहे. मंदिरातील स्वयंपाकी आणि सुरक्षा रक्षकाने बलात्कार केल्याचा आरोप पीडितेने केला आहे, असे पोलिसांनी सांगितले. महिलेच्या तक्रारीवरून पोलिसांनी संशयित आरोपींविरोधात गुन्हा दाखल केला आहे, अशी माहिती ग्रामीण जिल्हा पोलीस अधीक्षक आदित्य शुक्ला यांनी दिली. पीडित महिला गेल्या आठवड्यात कोलकाताहून बरसाना येथे आली होती. ११ सप्टेंबरला रात्रीच्या सुमारास ती या मंदिरात झोपली असताना दोघांनी तिच्यावर बलात्कार केला. पीडित महिलेला वैद्यकीय तपासणीसाठी रुग्णालयात पाठवण्यात आले आहे. संशयित आरोपींना लवकरच अटक करण्यात येईल, असे पोलिसांनी सांगितले. दरम्यान, ही घटना मंदिरातील सीसीटीव्ही कॅमेऱ्यात कैद झाल्याचे सूत्रांनी सांगितले.