कर्नाटकात भीषण अपघाताची घटना समोर आली आहे. म्हैसूर येथे बस आणि इन्होवा कारची समोरा-समोर धडक झाली आहे. ही धडक एवढी भीषण होती की कारच्या चिंधड्या उडाल्या आहेत. या घटनेत १० जणांचा मृत्यू झाला आहे. तर, एकजण गंभीर जखमी आहे. त्याला पुढील उपचारासाठी रुग्णालयात दाखल केलं आहे. म्हैसूरमधील तिरुमकूडलु नरसीपुर येथे हा अपघात झाला आहे. बस आणि इन्होवा कारची जोरदार धडक झाली. या भीषण अपघातात इन्होवा कारच्या चिंधड्या उडाल्या. यात २ लहान मुलांसह १० जणांचा मृत्यू झाला आहे. घटनेची माहिती मिळतात पोलीस तातडीने घटनास्थळी दाखल झाले. पोलिसांनी मृतदेह शवविच्छेदनासाठी पाठवले. तसेच, जखमी व्यक्तीला रुग्णालयात उपचारासाठी दाखल केलं. याप्रकरणी पोलीस अधिक तपास करत आहेत. मिळालेल्या माहितीनुसार, ११ जण सुट्टीसाठी म्हैसूरला जात होते. त्यापूर्वी ते चामुंडी हिल्स, मेल माहादेश्वरा हिल्स आणि बिलिगिरिरंगा हिल्स पाहण्यासाठी गेले होते. हे सर्व बेल्लारीजवळील संगनकल्लू गावाचे रहिवाशी आहेत. कर्नाटकचे मुख्यमंत्री सिद्धरामय्या यांनी मृतांच्या कुटुंबियांना मदत जाहीर केली आहे. "म्हैसूर येथे झालेल्या घटनेनं अत्यंत दु:ख झालं आहे. मृतांच्या कुटुंबियांना १० लाख रुपयांची मदत जाहीर करतो. तसेच, जखमींना योग्य ते उपचार मिळण्यासाठी अधिकाऱ्यांना निर्देश दिले आहेत," असं सिद्धरामय्या यांनी ट्वीट करत सांगितलं.
