‘१ कोटी ४० लाख लोक बलिदानासाठी तयार’, ट्रम्प यांनी दिलेली मुदत जवळ येताच इराणचाही निर्वाणीचा इशारा

देशाचे रक्षण करण्यासाठी एक कोटी ४० लाखांहून अधिक इराणी लोकांनी आपल्या प्राणांचे बलिदन देण्याची तयारी दर्शवली आहे. मी सुद्धा इराणसाठी माझे प्राण देण्यासाठी तयार आहे आणि राहीन, असे विधान पेझेश्कियन यांनी केले आहे. होर्मुझची सामुद्रधुनी खुली करण्यासाठी ट्रम्प यांनी मंगळवारी रात्री ८ वाजेपर्यंतची (ईस्टर्न टाइम) ‘मुदत’ निश्चित केली आहे. ट्रम्प यांनी दिलेल्या अंतिम मुदतीपूर्वी इराण होर्मुझची सामुद्रधुनी उघडणार का? हा महत्त्वाचा प्रश्न होता. मात्र यावर आता इराणनेही आपली भूमिका स्पष्ट केली आहे.

अंतिम मुदतीपूर्वी इराणकडून आव्हान

अमेरिकेचे राष्ट्राध्यक्ष ट्रम्प यांची कथित मुदत जवळ येत असताना इराणने माघार घेण्यास स्पष्ट नकार दिला आहे. अमेरिका आणि इस्रायलच्या संभाव्य हल्ल्यांच्या भीतीमुळे इराणी अधिकाऱ्यांनी तरूणांना वीज प्रकल्पांसारख्या महत्त्वाच्या ठिकाणांभोवती मानवी साखळी तयार करण्याचे आवाहन केले आहे. तसेच इराणने युद्धविरामाचा प्रस्ताव फेटाळून लावला असून हा संघर्ष कायमचा संपुष्टात आणावा, अशी मागणी केली आहे.

इराणवर तीव्र हल्ले

अमेरिका आणि इस्रायलने इराणवरील हल्ल्याची तीव्रता वाढवली आहे. शिराझमधील एका पेट्रोकेमिकल प्रकल्पासह इतर अनेक ठिकाणी अमेरिका आणि इस्रायलने पुन्हा हल्ले केले आहेत. इराणच्या प्रसारमाध्यमांनी दिलेल्या वृत्तानुसार अनेक भागांमध्ये जीवितहानी झाली आहे. इस्रायलने इराणी जनतेला सार्वजनिक वाहतूक व्यवस्था न वापरण्याचा सल्ला दिला आहे. यामुळे रेल्वेच्या पायाभूत सुविधांना लक्ष्य केले जाण्याची शक्यता वर्तवली जात आहे.

इराणला एका रात्रीत नष्ट करू

दरम्यान डोनाल्ड ट्रम्प यांनी व्हाईट हाऊसमधील पत्रकार परिषदेला संबोधित करताना म्हटले की, त्यांना संभाव्य युद्ध गुन्हे करण्याबद्दल मुळीच चिंता वाटत नाही. जर होर्मुझची सामुद्रधुनी खुली करण्यासंदर्भात इराणने मंगळवारची रात्री ८ वाजण्याची अंतिम मुदत पाळली नाही तर इराणच्या पायाभूत सुविधा नष्ट करू.

तसेच ट्रम्प पुढे म्हणाले की, इराणला एका रात्रीत संपवले जाऊ शकते. इराणच्या पुढील हालचालींवर त्यांचा संकटाचा काळ अवलंबून असेल.

‘आज रात्री इराणची संस्कृती नष्ट होणार’ – ट्रम्प यांची धमकी

डोनाल्ड ट्रम्प यांनी काही वेळेपूर्वी ट्रुथ या सोशल मीडिया साईटवर एक पोस्ट शेअर केली आहे. त्यात त्यांनी या धमकीचा इशारा दिला. ते म्हणाले, आज रात्री एक संपूर्ण संस्कृती नष्ट होईल. जी पुन्हा कधीही परत आणता येणार नाही. असे व्हावे, अशी माझी इच्छा नाही. पण कदाचित ते होईलच.

“तथापि, आता पूर्ण सत्तापालट होत आहे. जिथे, वेगळे, हुशार आणि कमी कट्टरतावादी विचारांच्या लोकांचे वर्चस्व असेल. ते कदाचित काहीतरी क्रांतिकारक अद्भुत असे घडवू शकतील, हे कुणालाही ठाऊक नाही.
जगाच्या प्रदीर्घ आणि गुंतागुंतीच्या इतिहासातील आजच्या सर्वात महत्त्वाच्या रात्रीच ते कळू शकेल. ४७ वर्षांची लूटमार, भ्रष्टाचार आणि मृत्यूचे तांडव अखेर संपुष्टात येईल”, असेही ट्रम्प पुढे म्हणाले आहेत.