रशियाच्या वैद्यकीय विद्यापीठातील चाकू हल्ल्यात चार भारतीय विद्यार्थी जखमी; भारतीय राजदूत रशियन अधिकाऱ्यांच्या संपर्कात

स्थानिक माध्यमांच्या प्राथमिक वृत्तानुसार, हस्तक्षेप करण्याचा प्रयत्न करताना दोन पोलिस अधिकारीही जखमी झाले. बाशकोर्तोस्तानची राजधानी उफा येथील स्टेट मेडिकल युनिव्हर्सिटीच्या वसतिगृहात हा हल्ला झाला. रशियाच्या गृह मंत्रालयाने सांगितले की, प्राथमिक माहितीनुसार, चाकू घेऊन सज्ज असलेल्या एका १५ वर्षीय मुलाने वैद्यकीय विद्यापीठाच्या वसतिगृहात प्रवेश केला आणि तेथे राहणाऱ्या विद्यार्थ्यांवर हल्ला केला, ज्यामध्ये अनेक विद्यार्थी जखमी झाले.

आरोपीने स्वतःलाही शारीरिक इजा केली

“हल्ल्याखोराने अटकेचा प्रतिकार केला, त्यादरम्यान दोन पोलिस अधिकाऱ्यांना चाकूने वार करण्यात आले. शिवाय, संशयिताने स्वतःलाही शारीरिक इजा केली”, असे गृह मंत्रालयाच्या प्रवक्त्या मेजर जनरल इरिना वोल्क यांनी सांगितले. अधिकाऱ्यांनी सांगितले की संशयिताला ताब्यात घेण्यात आले आहे. पीडितांना आणि हल्लेखोराला किती दुखापत झाली आहे हे लगेच कळू शकले नाही. तपास समितीने घटनेची चौकशी सुरू केली आहे.

भारतीय राजदूत रशियन अधिकाऱ्यांच्या संपर्कात

घटनेनंतरचे दृश्य दाखवणारा एक व्हिडिओ सोशल मीडियावर मोठ्या प्रमाणात शेअर केला जात आहे, त्यात पोलिस अधिकारी आरोपीला बर्फाच्या जाड थरांमधून बाहेर काढताना दिसत आहेत. याला “दुर्दैवी घटना” असे संबोधत मॉस्कोमधील भारतीय दूतावासाने म्हटले आहे की, “चार भारतीय विद्यार्थ्यांसह अनेक लोक जखमी झाले आहेत.” अधिकारी परिस्थितीवर बारकाईने लक्ष ठेवून आहेत आणि रशियन अधिकाऱ्यांच्या संपर्कात आहेत. जखमी विद्यार्थ्यांना मदत करण्यासाठी आणि पुढील मदतीसाठी समन्वय साधण्यासाठी काझानमधील भारतीय दूतावासाचे अधिकारी उफा येथे जात आहेत.

प्रत्यक्षदर्शींनी वसतिगृहातील दहशतीचे दृश्य वर्णन केले. रशियन माध्यमांनी साक्षीदारांच्या हवाल्याने सांगितले की हल्ल्यानंतर सर्वत्र रक्ताचे डाग पसरले होते. स्थानिक माध्यमांनी प्रसारित केलेल्या व्हिडिओ फुटेजमध्ये आपत्कालीन कर्मचारी जखमींना रुग्णवाहिकांमधून रुग्णालयात नेत असल्याचे दिसून आले.

रशियन अधिकाऱ्यांनी अद्याप संभाव्य हेतू किंवा संशयिताचा पीडितांशी पूर्वी काही संबंध होता का हे उघड केलेले नाही. रशियन अधिकाऱ्यांशी संबंध असलेल्या बाझा चॅनेलने दावा केला आहे की हल्लेखोर बंदी घातलेल्या नव-नाझी संघटनेचा होता.