मध्य प्रदेशातील बालाघाट येथे आदिवासी बालकांच्या मृत्यूची माहिती घेण्यासाठी गेलेले ‘कॉक्रोच जनता पार्टी’चे (CJP) संस्थापक अभिजित दिपके यांना स्थानिक पातळीवर विरोधाचा सामना करावा लागला. या घटनेच्या एका दिवसानंतर, रविवारी अभिजित दिपके यांनी मध्य प्रदेश सरकार आणि मुख्यमंत्री मोहन यादव यांच्यावर उपरोधिक शैलीत निशाणा साधला आहे. सोशल मीडियावर मुख्यमंत्रीपदाचा ‘राजीनामा’ शेअर करत त्यांनी राज्यातील आरोग्य यंत्रणा आणि सागर जिल्ह्यातील बनावट दारू दुर्घटनेवरून सरकारला धारेवर धरले. या संदर्भातील वृत्त ‘हिंदुस्तान टाइम्स’ या वृत्तसंस्थेने दिले आहे.
सोशल मीडियावर उपरोधिक राजीनामा
अभिजित दिपके यांनी सोशल मीडिया प्लॅटफॉर्म ‘एक्स’वर (ट्विटर) मुख्यमंत्रीपदाचे एक बनावट राजीनामा पत्र पोस्ट केले आहे. यात त्यांनी लिहिले, “मी तात्काळ प्रभावाने मध्य प्रदेशच्या मुख्यमंत्रीपदाचा राजीनामा देतो. मला मध्य प्रदेशातील जनतेची सेवा करण्याची संधी दिल्याबद्दल मी आदरणीय पंतप्रधान नरेंद्र मोदी यांचा आभारी आहे; परंतु या संधीचे सोने करण्यात आणि जनतेची सेवा करण्यात मी पूर्णपणे अपयशी ठरलो आहे.”
आपल्या या उपरोधिक पत्रात दिपके यांनी मुख्यमंत्री मोहन यादव आणि त्यांच्या सहकाऱ्यांवर जोरदार टीका केली. बालाघाटमधील चिमुकल्यांचा संसर्गजन्य आजाराने झालेला मृत्यू आणि सागर जिल्ह्यातील विषारी दारूकांड यांसारख्या गंभीर मुद्द्यांवरून त्यांनी राज्य सरकारच्या कारभारातील त्रुटींवर बोट ठेवले. यावर ‘सीजेपी’चे प्रवक्ते आशुतोष रांका यांनीही मिश्कील टिप्पणी करत, दिपके हे आपल्या जबाबदारीपासून ‘पळून जात आहेत’ असा टोला लगावला.
बालाघाटमध्ये नक्की काय घडले?
मध्य प्रदेशातील बालाघाट जिल्ह्यातील अदोरी, कोरका आणि बोंडारी या भागात संसर्गजन्य आजारामुळे अनेक आदिवासी बालकांचा मृत्यू झाल्याचा आरोप आहे. या घटनेची प्रत्यक्ष माहिती घेण्यासाठी आणि आरोग्य सुविधांची पाहणी करण्यासाठी अभिजित दिपके शनिवारी बालाघाट दौऱ्यावर गेले होते.
दरम्यान, पाहणी करून गाडीतून परतत असताना काही सोशल मीडिया ‘इन्फ्लुएन्सर्स’ने त्यांची गाडी अडवली. एका महिला इन्फ्लुएन्सरने दिपके यांच्या तोंडासमोर थेट माईक धरत, “तुम्ही इथे मृतदेहांचे राजकारण करायला आला आहात का? आणि एवढ्या उशिरा का आलात?” असा सवाल केला. त्यावर दिपके यांनी उशिरा आल्याबद्दल दिलगिरीही व्यक्त केली. मात्र, वातावरण तापल्याचे पाहून त्यांच्या कार्यकर्त्यांनी त्यांना दुसऱ्या गाडीत बसवून सुरक्षितस्थळी हलवले. तेथून निघून जात असताना त्या महिलेने “पळून गेला, पळून गेला” असा गदारोळ केला.
या घटनेनंतर स्थानिक पत्रकारांनी आश्चर्य व्यक्त केले. दुर्गम गावात अचानक बाहेरून आलेले हे इन्फ्लुएन्सर्स कोण होते आणि दिपके यांच्या दौऱ्यात अडथळा आणण्यासाठी त्यांना कोणी पाठवले होते का, असा संशय आता व्यक्त केला जात आहे.
बालकांच्या मृत्यूवर उच्च न्यायालयाचे सरकारला समन्स
बालाघाट भागातील आरोग्य यंत्रणेची दैना आणि ३० हून अधिक बालकांचा झालेला मृत्यू यावर मध्य प्रदेश उच्च न्यायालयानेही गंभीर दखल घेतली आहे. एका जनहित याचिकेवर (PIL) सुनावणी करताना न्यायालयाने राज्य आरोग्य विभाग, महिला व बालविकास विभाग आणि बालाघाट जिल्हाधिकाऱ्यांना नोटीस बजावून उत्तर मागितले आहे.
याचिकेत नमूद केल्यानुसार, या भागात तीव्र अस्वच्छता असून त्यामुळे संसर्ग पसरत आहे. केवळ ५० खाटांची क्षमता असलेल्या रुग्णालयात तब्बल ४०० मुलांवर उपचार सुरू असल्याचे आणि योग्य उपचारांअभावी बालकांचे प्राण जात असल्याचा गंभीर आरोप करण्यात आला आहे.
सागरमधील विषारी दारूकांड आणि ‘फॉमेपिझोल’ औषध
दुसरीकडे, मध्य प्रदेशातील सागर जिल्ह्यातील बांदा भागात बनावट आणि विषारी दारू पिल्यामुळे १६ जणांचा मृत्यू झाला आहे. याप्रकरणी पोलिसांनी आतापर्यंत १९ आरोपींना अटक केली आहे.
या दुर्घटनेनंतर बाधित रुग्णांवर उपचारासाठी ‘फॉमेपिझोल’ (Fomepizole) या अँटीडोटचा (विषरोधी औषध) प्रभावी वापर करण्यात आला. मिथॅनॉलसारख्या विषारी दारूच्या प्राशनानंतर शरीरात विषारी घटक पसरण्यापासून रोखण्यासाठी हे औषध अत्यंत महत्त्वाचे ठरते. वैद्यकीय अधिकाऱ्यांच्या माहितीनुसार, या औषधामुळे सागर दुर्घटनेतील ३० हून अधिक बाधित रुग्णांचे प्राण वाचवण्यात यश आले आहे.
