पतीच्या हत्येनंतर त्याच्या मृतदेहासमोरच पत्नी पॉर्न व्हिडीओ पाहत होती, प्रियकराच्या मदतीने केली हत्या

पोलिसांनी दिलेल्या माहितीनुसार, आरोपी लक्ष्मी माधुरीने प्रियकराबरोबर पतीच्या हत्येचा कट रचला. पतीचे नाव लोकम शिव नागराजू असून तो कांदा व्यापारी होता. पोलिसांनी दिलेल्या माहितीनुसार, हत्येच्या रात्री माधुरीने पतीसाठी बिर्याणीचा बेत आखला होता. यात नशेचा पदार्थ मिसळल्यामुळे नागराजूची शुद्ध हरपली.

अशी आखली हत्येची योजना

पती बेशूद्ध होताच माधुरीने कटाची पुढची योजना अमलात आणली. रात्री ११.३० वाजता माधुरीचा कथित प्रियकर गोपी त्यांच्या घरी आला. पोलिसांनी सांगितल्यानुसार, नागराजूच्या छातीवर बसून गोपीने त्याला पकडून ठेवले होते. तेव्हा माधुरीने उशीच्या सहाय्याने पतीचा श्वास कोंडला. यामुळे काही वेळातच नागराजूचा मृत्यू झाला.

नागराजू मरण पावल्याची खात्री झाल्यानंतर गोपी तिथून निघून गेला. माधुरी आणि नागराजूचे पार्थिव त्याच घरात होते. यानंतर जे काही झाले, ते ऐकून तपासकर्ते पोलीसही हादरून गेले. पतीच्या मृत्यूनंतर पत्नी माधुरी शांतपणे तिथेच बसली. वेळ घालविण्यासाठी ती मोबाइलवर पॉर्न व्हिडीओ पाहत होती.

पहाटे केला कांगावा

पहाटे ४ वाजता तिने शेजारपाजारच्या लोकांना गोळा केले आणि नागराजूचा हृदयविकाराच्या धक्क्याने मृत्यू झाल्याचे सांगितले. मात्र तिने सांगितलेल्या कथानकांवर लोकांचा विश्वास बसेना. माधुरी आणि नागराजू यांच्यातील सततचे भांडण आणि तिच्या बाहेरच्या संबंधांची शेजाऱ्यांना कल्पना होती. यामुळे त्यांना माधुरीवर संशय आला.

पतीच्या मित्रांना आला संशय

नागराजूच्या मित्रांनी जेव्हा त्याचे शव पाहिले, तेव्हा त्यांना कानाजवळ रक्ताचे डाग आणि शरीरावर जखमा दिसल्या. यानंतर त्यांनी पोलिसांना याची माहिती दिली. पोलिसांनी हस्तक्षेप केल्यामुळे नागराजूच्या मृतदेहाचे शवविच्छेदन करण्यात आले. ज्यामध्ये श्वास कोंडल्यामुळे त्याचा मृत्यू झाल्याचे समोर आले. तसेच त्याच्या छातीच्या हाडांमध्ये फ्रॅक्चर असल्याचेही समोर आले.

पोलिसांनी अहवालानंतर माधुरीची कसून चौकशी केली. त्यानंतर तिने आपला गुन्हा कबूल केला. पतीची हत्या केल्यानंतर रात्रभर आपण पॉर्न व्हिडीओ पाहत होतो, असा खुलासाही तिने केला. यानंतर पोलिसांनी हत्येचा गुन्हा दाखल केला असून या प्रकरणातील इतर पैलूंचा तपास सुरू केला आहे.