Gujarat EX CM Vijay Rupani Passes Away in Air India Plane Crash : अहमदाबादमधून देशाला हादरवणारी घटना समोर आली आहे. अहमदाबादवरून लंडनला जाणारं एअर इंडियाचं प्रवासी विमान एआय-१७१ उड्डाणानंतर तीन मिनिटांनी विमानतळाच्या सीमेजवळ कोसळलं असून या विमानातील सर्व प्रवासी, पायलट व क्रू सदस्यांचा या अपघातात मृत्यू झाला आहे. दी इंडियन एक्सप्रेसने या वृत्ताची पुष्टी केली आहे. या विमानाने गुजरातचे माजी मुख्यमंत्री विजय रुपाणी देखील प्रवास करत होते. या अपघातात त्यांचा देखील मृत्यू झाला आहे. या विमान दुर्घटनेमुळे संपूर्ण देश शोकसागरात बुडाला आहे.
या विमानाने प्रवास करणाऱ्या प्रवाशांच्या नावांची यादी (Boarded Passenger) काही वृत्तसंस्थांनी प्रसिद्ध केली आहे. यामध्ये १२ व्या नंबरवर विजय रमणिकलाल रुपाणी असं नाव आहे. २ डी हा त्यांचा सीट नंबर होता. त्यांचा विमानाचा बोर्डिंग पास व विमानात बसल्यानंतरचा एक फोटो समोर आला आहे. त्यामुळे विजय रुपाणी देखील या विमानात होते याची प्रसारमाध्यमांनी पुष्टी केली आहे.
भाजपाचा गुजरातमधील आश्वासक चेहरा हरपला
नरेंद्र मोदी पंतप्रधान बनल्यानंतर गेल्या १० वर्षांत ज्या भाजपा नेत्यांनी गुजरातवर नियंत्रण ठेवलं त्यापैकी एक नाव म्हणजे विजय रुपाणी. ते गुजरातचे १६ मे मुख्यमंत्री होते. त्यांनी ५ वर्षे ३७ दिवस या राज्याचा कारभार संभाळला. विद्यार्थीदशेत असतानाच त्यांनी भाजपाची विद्यार्थी शाखा असलेल्या अखिल भारतीय विद्यार्थी परिषदेत (एबीव्हीपी) प्रवेश केला. त्यानंतर त्यांनी आरएसएस कार्यकर्ता म्हणून स्थानिक पातळीवर काम केलं. तर, त्यांनी १९७१ मध्ये जनसंघात प्रवेश करून राजकीय कारकिर्दीला सुरुवात केली. १९७६ मध्ये आणीबाणीच्या काळात ते ११ वर्षे तुरुंगात होते.
नगरसेवक ते मुख्यमंत्री असा यशस्वी प्रवास
विजय रुपाणी हे १९८७ मध्ये राजकोट महापालिकेत नगरसेवक म्हणून निवडून आले. १९९६-९७ मध्ये ते राजकोटचे उपमहापौर बनले. तर,१९९८ मध्ये गुजरात भाजपाचे महासचिव, २००६ मध्ये गुजरात पर्यटन महामंडळाचे अध्यक्ष, २०१४ ते २०२२ अशी आठ वर्षे ते राजकोटचे आमदार होते. या काळात त्यांनी अनेक मंत्रिपदे देखील भूषवली आहेत. आनंदीबेन पटेल यांनी गुजरात्या मुख्यमंत्रिपदाचा राजीनामा दिल्यानंतर ७ ऑगस्ट २०१६ रोजी ते गुजरातचे मुख्यमंत्री बनले.
