बंगळुरूवरून दिल्लीला जाणाऱ्या एअर इंडियाच्या विमानाचे इंजिन हवेतच पेटले; क्रू मेंबरला आग दिसली अन…

लँडिंगपूर्वीच कॉकपिटमध्ये ‘फायर वॉर्निंग’

मिळालेल्या माहितीनुसार, एअर इंडियाचे ‘AI 2802’ (Airbus A321) हे विमान बंगळुरूवरून दिल्लीसाठी रवाना झाले होते. गुरुवारी (२१ मे) रात्री ९:३० च्या सुमारास विमान दिल्ली विमानतळावर उतरण्याच्या अंतिम टप्प्यात (Final Approach) असताना, अचानक कॉकपिटमध्ये एका इंजिनमधून धूर निघत असल्याचे संकेत (Fire Indication) मिळाले. वैमानिकांनी तपासणी केली असता इंजिनला आग लागल्याची खात्री झाली. परिस्थितीचे गांभीर्य ओळखून वैमानिकांनी तात्काळ एअर ट्रॅफिक कंट्रोलला (ATC) याची माहिती दिली आणि विमानात आणीबाणीची घोषणा करण्यात आली.

धावपट्टी काही काळासाठी बंद; प्रवाशांना सुखरूप बाहेर काढले

धोक्याचा इशारा मिळताच विमानतळावर अग्निशामक दल आणि आपत्कालीन यंत्रणा सज्ज करण्यात आल्या. रात्री ९:३० वाजता विमानतळाच्या धावपट्टी क्रमांक ’29R’ वर विमानाचे सुरक्षित लँडिंग करण्यात आले. लँडिंग झाल्यानंतर इंजिनमधील आग पूर्णपणे विझवण्यात यश आले.

या घटनेमुळे विमानतळावरील विमान वाहतूक काही काळासाठी थांबवण्यात आली होती. लँडिंगनंतर विमान सुरक्षितपणे धावपट्टीवरून बाजूला नेण्यात आले (Towed) आणि सर्व प्रवाशांना सुखरूप खाली उतरवण्यात आले. यामुळे मोठा अनर्थ टळला असून प्रवाशांनी सुटकेचा श्वास सोडला आहे.

एअर इंडिया आणि नागरी विमान वाहतूक महासंचालनालयाचे (DGCA) अधिकृत पत्रक

या संपूर्ण घटनेवर एअर इंडियाच्या प्रवक्त्याने अधिकृत भूमिका मांडली आहे. त्यांनी सांगितले, “२१ मे २०२६ रोजी बेंगळुरू ते दिल्ली दरम्यान उड्डाण करणाऱ्या ‘AI 2802’ या विमानात तांत्रिक बिघाड झाल्याच्या घटनेला आम्ही दुजोरा देत आहोत. लँडिंग दरम्यान वैमानिकांना इंजिनमध्ये आग लागल्याचे संकेत मिळाले होते. वैमानिकांनी सर्व मानकांचे आणि सुरक्षा नियमांचे पालन करत विमान दिल्ली विमानतळावर सुरक्षितपणे उतरवले. सर्व प्रवासी आणि क्रू मेंबर्स सुरक्षित आहेत.”

पुढील कारवाईबाबत बोलताना प्रवक्त्याने सांगितले की, या घटनेच्या सखोल चौकशीचे आदेश देण्यात आले आहेत. संबंधित सरकारी यंत्रणांच्या मदतीने या तांत्रिक बिघाडाचे नेमके कारण शोधले जाईल. प्रवाशांची सुरक्षा हीच आमची सर्वोच्च प्राथमिकता आहे.

DGCA कडून चौकशी सुरू

भारतातील विमान वाहतूक क्षेत्रातील सर्वोच्च संस्था असलेल्या ‘नागरी विमान वाहतूक महासंचालनालय’ (DGCA) च्या पथकाने या घटनेची गंभीर दखल घेतली असून, त्यांनी रात्रीच घटनास्थळी पोहोचून तपास सुरू केला आहे. इंजिनमध्ये नेमकी आग कशामुळे लागली, याची तांत्रिक तपासणी केली जात आहे.