Avadh Ojha Sir Joins Aam Admi Party : यूपीएससी क्लासेससाठी प्रसिद्ध असणारे अवध ओझा सर यांनी राजकारणात उतरण्याचा निर्णय घेतला आहे. त्यांनी माजी मुख्यमंत्री अरविंद केजरीवाल यांच्या उपस्थितीत दिल्लीत एका कार्यक्रमामध्ये आम आदमी पक्षात प्रवेश केला. यावेळी मनीष सिसोदिया देखील उपस्थित होते. येत्या काही दिवसांत दिल्लीत विधानसभेच्या निवडणुका होणार असून, ते आपच्या तिकिटावर दिल्लीत निवडणूक लढवतील अशी शक्यता वर्तवली जात आहे.
अवध ओझा यांना पक्षात घेतल्याने विधानसभा निवडणुकीत फायदा होईल, अशी आशा आम आदमी पक्षाला आहे. कारण ओझा यांची सोशल मीडियावर आणि तरुणांमध्ये मोठी लोकप्रियता आहे. अनेकवेळा आपण अवध ओझा यांनी आपचे समन्वयक आणि माजी मुख्यमंत्री अरविंद केजरीवाल यांचे कौतुक केल्याचे पाहिले असेल.
कोण आहेत अवध ओझा?
अवध ओझा हे देशातील नावाजलेले शिक्षक आहेत. लोक त्यांना अवध ओझा सर या नावानेही ओळखतात. ते यूपीएससी विद्यार्थ्यांना इतिहास विषय शिकवतात. त्यांचा स्वतःचा कोचिंग क्लासही आहे. अवध ओझा हे उत्तर प्रदेशातील गोंडा येथील रहिवासी आहे. त्यांचे पूर्ण नाव अवध प्रताप ओझा आहे. त्यांचा जन्म ३ जुलै १९८४ रोजी झाला असून त्यांच्या वडिलांचे नाव श्रीमाता प्रसाद ओझा आहे. अवध ओझा यांचे वडिल गोंडा येथे पोस्टमास्तर म्हणून काम करायचे. अवध ओझा यांची आई पेशाने वकील आहे. ओझा यांचे प्राथमिक शिक्षण गोंडा येथेच झाले. त्यानंतर त्यांनी गोंडा येथील फातिमा इंटर कॉलेजमधून पदवीचे शिक्षण पूर्ण केले आहे.
हे ही वाचा : ISKCON च्या ५० हून अधिक सदस्यांना बांगलादेशने भारतात येण्यापासून का रोखलं? जाणून घ्या, सीमेवर नेमकं काय घडलं
निवडणूक न लढवण्याचा दावा
अवध ओझा यांचे भारतीय प्रशासकीय सेवेत अधिकारी होण्याचे स्वप्न होते. यासाठी दिल्लीला येत त्यांनी याची तयारी सुरू केली होती. मात्र, यामध्ये त्यांना यश मिळाले नाही. त्यामुळे त्यांनी दिल्लीतच यूपीएससीच्या विद्यार्थ्यांसाठी कोचिंग क्लासेस सुरू केले. २८ नोव्हेंबर २०२२ रोजी लॅलनटॉपला दिलेल्या मुलाखतीत त्यांनी स्पष्टपणे सांगितले होते की, ते कधीही निवडणूक लढवणार नाहीत. राज्यसभेसाठी कोणताही प्रस्ताव आला तरी तो स्वीकारणार नाहीत. जनसत्ताने याबाबतचे वृत्त दिले आहे. २०२० मध्ये अवध ओझा यांनी यूट्यूब चॅनल सुरू केले असून, त्याचे नाव RAY Avadh Ojha असे आहे. ओझा सर IQRA IAS चे संस्थापकही आहेत.
