बिहारमध्ये शेतकऱ्याच्या खात्यात चुकून जमा झाले तब्बल ५२ कोटी; म्हणाला, “थोडे पैसे …”

चुकून जमा झालेल्या रकमेनंतर ‘या’ वृद्ध शेतकऱ्याने सरकारकडे एक आवाहन केलं आहे.

Bihar Farmer Receives 52 Crore Rupees Pension Account gst 97
शेतकरी राम बहादूर शाह यांच्या पेन्शन खात्यात चुकून चक्क ५२ कोटी रुपये जमा झाले आहेत.

तुमच्या बँक खात्यात अचानक एका दिवशी कोट्यावधी रुपये जमा झाले तर? बिहारच्या मुजफ्फरपूर जिल्ह्यातील एका शेतकऱ्यासोबत असं घडलं आहे. शेतकरी राम बहादूर शाह यांच्या पेन्शन खात्यात चुकून चक्क ५२ कोटी रुपये जमा झाले आहेत. दरम्यान, त्यानंतर या शेतकऱ्याने सरकारकडे एक आवाहन केलं आहे. आपल्या खात्यात चुकीने जमा झालेल्या या ५२ कोटींपैकी काही पैसे मला स्वतःसाठी ठेवण्याची परवानगी द्यावी, अशी मागणी या वृद्ध शेतकऱ्याने केली आहे. किमान उर्वरित आयुष्यात तरी आपल्याला आर्थिक ताणाचा सामना करावा लागू नये म्हणून त्यानी सरकारकडे ही मागणी केल्याचं समजतं.

“आम्हाला यापैकी काही रक्कम द्यावी. जेणेकरून आम्ही आमचं उर्वरित आयुष्य सुरळीतपणे घालवू शकू”, असं आवाहन राम बहादूर शाह यांनी सरकारकडे केल्याचं वृत्त ‘इंडिया टुडे’ने दिलं आहे. कटिहार पोलीस स्टेशन अंतर्गत येणाऱ्या एका गावात राहणाऱ्या वृद्ध शेतकऱ्याने आपल्या पेन्शनच्या खात्याची स्थिती विचारण्यासाठी, अपडेट मागण्यासाठी जवळच्या ग्राहक सेवा केंद्राशी (सीएसपी) संपर्क साधला तेव्हा चुकून आपल्या पेन्शन खात्यात करोडो रुपये जमा झाले आहेत हे त्यांना कळलं.

आम्हाला धक्काच बसला!

राम बहादूर शाह यावर प्रतिक्रिया देताना म्हणाले की, “हे ऐकून आम्हाला धक्काच बसला आणि आश्चर्य देखील वाटलं की ही एवढी मोठी रक्कम कुठून आली? आम्ही आमचा संपूर्ण आयुष्य शेतीकामात घालवलं आहे. त्यामुळे, मी फक्त सरकारला इतकंच आवाहन करतो की, आम्हाला यापैकी काही रक्कम द्यावी. जेणेकरून आमचं उर्वरित आयुष्य सुरळीत होईल.

सरकारने आम्हाला मदत करावी!

राम बहादूर शाहचा मुलगा सुजीत कुमार गुप्ता म्हणाला की, माझ्या वडिलांच्या खात्यात ५२ कोटींपेक्षा जास्त रक्कम जमा झाली आहे. मात्र, “आम्ही रकमेमुळे काहीसे चिंतेत आहोत. आम्ही शेतकरी आहोत आणि गरीब कुटुंबातील आहोत म्हणून सरकारने आम्हाला मदत करावी अशी आमची मागणी आहे”, असं सुजित कुमार गुप्ताने म्हटलं. दरम्यान, कटरा पोलीस स्टेशनचे उपनिरीक्षक मनोज पांडेर म्हणाले की, “सध्या आम्ही स्थानिक अधिकाऱ्यांना या प्रकरणाची माहिती दिली आहे. पोलीस या प्रकरणाची चौकशी करतील. राम बहादूर शाह यांचं खातं असलेल्या बँकेच्या अधिकाऱ्याची चौकशी करतील.”

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व देश-विदेश बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Bihar farmer receives 52 crore rupees pension account gst