भाजपाची तरुण मतदारांसाठी नवी रणनीती! जेन झी मोहिमेसाठी स्मृती इराणी, विनोद तावडेंकडे मोठी जबाबदारी

भाजपा नेत्यांशी संवाद साधण्याची संधी

एएनआयने वृत्त दिलं आहे की, “या संपर्क मोहिमेसाठी गठित करण्यात आलेल्या टीममध्ये भाजपाचे राष्ट्रीय अध्यक्ष नितीन नबीन, राष्ट्रीय सरचिटणीस स्मृती इराणी आणि विनोद तावडे, गुजरातचे मंत्री हर्ष संघवी, छत्तीसगडचे मंत्री ओ. पी. चौधरी यांच्यासह इतर अनेक नेत्यांचा समावेश करण्यात आला आहे.” पक्ष ही मोहीम लवकरच सुरू करण्याची शक्यता असून, यामध्ये प्रामुख्याने जेन झी (तरुण पिढी) च्या आकांक्षा, चिंता आणि अपेक्षांवर लक्ष केंद्रित केलं जाईल. तसंच तरुणांना भाजपा नेत्यांशी संवाद साधण्याची संधी दिली जाईल.

भाजपाची ही जेन झी संपर्क मोहीम अशा वेळी समोर आली आहे, जेव्हा विरोधकांनीही तरुण मतदारांसोबतचा आपला संपर्क वाढवला आहे. काँग्रेस नेते राहुल गांधी शनिवारी पुण्यात ‘छात्रों की गूंज’ कार्यक्रमाचे आयोजन करणार आहेत. यापूर्वी कोटा, डेहराडून आणि प्रयागराज येथेही असेच कार्यक्रम झाले आहेत. एआयएसएसएमएस कॉलेज मैदानावर होणाऱ्या या कार्यक्रमात पेपर फुटी, परीक्षांमधील अनियमितता आणि शिक्षण शुल्कातील वाढ यासारख्या समस्यांवर लक्ष केंद्रित केले जाण्याची अपेक्षा आहे. तसंच तरुण महिला आणि त्यांच्याशी संबंधित मुद्द्यांवरही यात भर दिला जाईल. आयोजकांना या कार्यक्रमात ८ हजार ते १० हजार लोकांच्या उपस्थितीची अपेक्षा असून, हा कार्यक्रम दुपारी साडेचार ते रात्री साडेनऊ या वेळेत होणार आहे.

भाजपाने राहुल गांधी यांच्या पुण्याच्या कार्यक्रमावर हल्लाबोल केला आहे. भाजपा प्रवक्ते नवनाथ बन यांनी या कार्यक्रमाला “पैसे की गूंज” असं संबोधलं असून, काँग्रेसने गर्दी जमवण्यासाठी सोशल मीडिया इन्फ्लुएन्सर्सना पैसे दिल्याचा आरोप केला आहे. बन यांनी दावा केला आहे की, या कार्यक्रमाचा प्रचार करण्यासाठी इन्फ्लुएन्सर्सना ३५ हजार रुपयांपर्यंतची ऑफर देण्यात आली होती आणि गर्दी गोळा करण्यासाठी काँग्रेसने सुमारे १० कोटी रुपये खर्च केले असावेत. काँग्रेसने मात्र हे आरोप फेटाळून लावले आहेत.

भाजपाच्या जेन झीच्या मोहिमेमध्ये काय असणार?

भाजपाच्या ‘जेन झी’ मोहिमेमध्ये तरुण मतदारांच्या समस्या समजून घेण्यासाठी संवाद, चर्चा आणि इतर संपर्क उपक्रमांचा समावेश असण्याची अपेक्षा आहे. या मोहिमेचे वेळापत्रक, स्वरूप आणि ठिकाणांबाबत सविस्तर माहिती लवकरच जाहीर होण्याची शक्यता आहे. तत्पूर्वी, शनिवारी भाजपाचे राष्ट्रीय अध्यक्ष नितीन नबीन यांच्या अध्यक्षतेखाली पक्षाच्या नवनियुक्त राष्ट्रीय टीमची पहिली परिचयात्मक बैठक पार पडली. या बैठकीने भाजपाच्या नवीन पदाधिकाऱ्यांच्या टीमच्या कामकाजाची अधिकृत सुरुवात झाली. बैठकीपूर्वी राष्ट्रीय गीत ‘वंदे मातरम’च्या सर्व सहा चरणांचे गायन करण्यात आले. नव्याने घोषित करण्यात आलेल्या राष्ट्रीय टीममध्ये विनोद तावडे आणि सुनील बन्सल हे राष्ट्रीय सरचिटणीस म्हणून कायम राहतील. तर बिप्लव कुमार देव, स्मृती इराणी, सतीश पुनिया, गजेंद्र पटेल, हरीश द्विवेदी आणि संजय भाटिया यांची नवीन राष्ट्रीय सरचिटणीस म्हणून नियुक्ती करण्यात आली आहे.

केंद्रीय मंत्री पीयूष गोयल यांच्यावर पक्ष संघटनेत अतिरिक्त जबाबदारी सोपवण्यात आली असून त्यांची राष्ट्रीय कोषाध्यक्ष म्हणून नियुक्ती करण्यात आली आहे, तर राजस्थानचे राजेश मंगल यांची राष्ट्रीय सह-कोषाध्यक्ष म्हणून नियुक्ती करण्यात आली आहे. ‘जेन झी’ संपर्क टीम आता भाजपाच्या प्रस्तावित मोहिमेची तयारी करणार असून, पक्ष आगामी दिवसांत या उपक्रमाचा सविस्तर तपशील जाहीर करेल अशी अपेक्षा आहे.