BJP New National Executive Committee: आगामी राजकीय घडामोडी आणि संभाव्य केंद्रीय मंत्रिमंडळ विस्ताराच्या चर्चांदरम्यान, भारतीय जनता पक्षाने (भाजपा) आपल्या केंद्रीय संघटनरचनेत अत्यंत महत्त्वाचे फेरबदल केले आहेत. पक्षाध्यक्ष नितीन नबीन यांनी जाहीर केलेल्या नव्या केंद्रीय कार्यकारिणीत माजी केंद्रीय मंत्री स्मृती इराणी आणि माजी राष्ट्रीय सरचिटणीस राम माधव यांचे पक्षाच्या मुख्य नेतृत्वात मोठे पुनरागमन झाले आहे. दुसरीकडे, पक्षाचे आयटी सेलप्रमुख अमित मालवीय यांची या पदावरून गच्छंती करण्यात आली आहे.
स्मृती इराणी यांच्यावर मोठी जबाबदारी
सोमवारी जाहीर करण्यात आलेल्या नव्या अधिसूचनेनुसार स्मृती इराणी यांची भाजपच्या राष्ट्रीय सरचिटणीसपदी (National General Secretary) नियुक्ती करण्यात आली आहे. लोकसभा निवडणुकीनंतरच्या बदलत्या समीकरणांनंतर स्मृती इराणी यांच्याकडे राष्ट्रीय स्तरावर पुन्हा एकदा संघटनात्मक कामाची मुख्य धुरा सोपवण्यात आली आहे.
पियूष गोयल पक्षाचे नवे कोषाध्यक्ष, तर राम माधव उपाध्यक्ष
केंद्रीय मंत्री पियूष गोयल यांच्याकडे पक्षाच्या ‘राष्ट्रीय कोषाध्यक्ष’पदाची (National Treasurer) महत्त्वाची जबाबदारी सोपवण्यात आली आहे. तसेच राम माधव यांची राष्ट्रीय उपाध्यक्ष म्हणून नवी नियुक्ती करण्यात आली असून, राष्ट्रीय सरचिटणीस विनोद तावडे यांनी आपले पद कायम राखले आहे.
अमित मालवीय यांची गच्छंती; दीपक म्हस्के नवे आयटी सेल प्रमुख
या फेरबदलातील सर्वात लक्षवेधी निर्णय म्हणजे भाजपच्या आयटी सेलचे (IT Cell) प्रमुख अमित मालवीय यांची गच्छंती. त्यांच्या जागी आता छत्तीसगडचे दीपक म्हस्के यांची भाजपच्या राष्ट्रीय आयटी सेलच्या प्रमुखपदी निवड करण्यात आली आहे. पक्षाच्या प्रसारमाध्यम विभागाची (Media In-Charge) धुरा खासदार अनिल बलूनी यांच्याकडेच कायम ठेवली आहे.
उपाध्यक्षपदांवर महिला नेत्यांचा भर
भाजपाने जाहीर केलेल्या १३ राष्ट्रीय उपाध्यक्षांच्या यादीत तब्बल ६ महिला नेत्यांचा समावेश करण्यात आला आहे. यामध्ये राजस्थानच्या माजी मुख्यमंत्री वसुंधरा राजे आणि दिल्लीच्या नेत्या रेखा वर्मा यांचा समावेश आहे.
नव्या कार्यकारिणीची ठळक वैशिष्ट्ये:
- मोठ्या नेत्यांचे पुनरागमन: स्मृती इराणी आणि राम माधव यांच्याकडे संघटनात्मक पातळीवर केंद्रस्थानी पुन्हा महत्त्वाच्या जबाबदाऱ्या.
- नेतृत्वात फेरबदल: अमित मालवीय यांच्याऐवजी दीपक म्हस्के यांच्याकडे आयटी सेलची जबाबदारी, तर पियूष गोयल नवे कोषाध्यक्ष.
- महिलांना भक्कम प्रतिनिधित्व: १३ राष्ट्रीय उपाध्यक्षांपैकी ६ पदांवर महिला नेत्यांची निवड.
- अनुभवी आणि नव्या फळीचा मेळ: आगामी विधानसभा निवडणुका आणि संघटनात्मक संतुलन साधण्यासाठी पक्षाध्यक्ष नितीन नबीन यांची ही नवी मोर्चेबांधणी.
निवडणुकांच्या रणनीतीसाठी ‘मास्टरस्ट्रोक’
नजीकच्या काळात होणाऱ्या राज्यांमधील विधानसभा निवडणुका भाजपसाठी अत्यंत महत्त्वाच्या आहेत. या निवडणुकांचे व्यवस्थापन, प्रचार आणि पक्षांतर्गत समन्वय अधिक मजबूत करण्यासाठी नितीन नवीन यांच्या नव्या टीमवर मोठी जबाबदारी असणार आहे. स्मृती इराणी यांचे वक्तृत्व आणि प्रशासकीय अनुभव, तर वसुंधरा राजे यांचा राजस्थानसह उत्तर भारतातील राजकीय प्रभाव पक्षासाठी फायदेशीर ठरेल असा अंदाज राजकीय विश्लेषकांनी वर्तवला आहे.
भाजपच्या या नव्या संघटनात्मक रचनेमुळे पक्षाच्या गोटात नवा उत्साह पाहायला मिळत असून, आगामी राजकीय आव्हानांना तोंड देण्यासाठी पक्ष पूर्णपणे सज्ज झाल्याचे चित्र दिसत आहे.
