Corruption investigation in Bribe Case leads to massive cash seizure from Government Official : आतापर्यंत लाचखोरीची असंख्य प्रकरण आपण पाहिली. अगदी शंभऱ रुपयापासून कोट्यवधींची लाच सरकारी अधिकाऱ्यांनी घेतल्याचेही प्रकार समोर आले आहेत. अशी लाचखोरी समो आल्यानंतर संबंधित राज्यातील तपास यंत्रणांकडून अधिकाऱ्यांच्या घराचीही तपासणी केली जाते. त्यात अनेकदा मोठं घबाड सापडतं. आता ओडिशामधून अशी एक धक्कादायक माहिती समोर आली आहे.
परवानाधारक कोळसा विक्रेत्याकडून ३० हजारांची लाच घेणाऱ्या एका खाण उपसंचालकाला रंगेहाथ पकडण्यात आलं. ओडिशा दक्षता पथकाने ही कारवाई केली असून कटक सर्कलमध्ये हा प्रकार घडला आहे. दरम्यान, लाच घेताना पकडल्यानंतर संबंधित अधिकाऱ्याच्या घराची झडती घेण्यात आली. त्यावेळी त्याच्या घरात ४ कोटींची रोख रक्कम सापडली असल्याचे धक्कादायक वृत्त एएनआयने दिले आहे. विशेष म्हणजे, ट्रॉली बॅग आणि कपाटात लपवून ठेवलेली ही रोकड ओडिशा व्हिजिलन्सच्या इतिहासात जप्त केलेली सर्वाधिक रक्कम आहे.
सापळा रचून अधिकाऱ्याला अटक
एका अधिकृत प्रेस नोटनुसार, मोहंती यांना मंगळवारी व्यापाऱ्याकडून लाच घेताना रंगेहाथ पकडण्यात आले. तक्रारदाराच्या कोळसा डेपोचे कामकाज सुरळीत चालविण्यासाठी आणि कोळशाची वाहतूक करण्यास परवानगी देण्याच्या बदल्यात अधिकाऱ्याने बेकायदेशीर लाच मागितल्याचा आरोप आहे. तक्रारीवरून कारवाई करताना, दक्षता अधिकाऱ्यांनी सापळा रचला आणि व्यवहाराच्या वेळी मोहंतीला अटक केली. त्याच्या ताब्यातून लाचेची संपूर्ण ३०,००० रुपये जप्त करण्यात आली आणि नंतर साक्षीदारांच्या उपस्थितीत जप्त करण्यात आली.
यशस्वी सापळ्यानंतर, त्याच्या उत्पन्नाच्या स्रोतांपेक्षा जास्त मालमत्ता जमवल्याची शक्यता तपासण्यासाठी त्याच्या भुवनेश्वर फ्लॅट, भद्रकमधील पालकांचे घर आणि कटकमधील ऑफिस चेंबरमध्ये एकाच वेळी छापे टाकण्यात येत आहेत. दक्षता पथकाने त्याच्या ऑफिसच्या ड्रॉवर आणि ताब्यातून १.२० लाख रुपये देखील जप्त केले. जप्त केलेल्या इतर मालमत्तेत भुवनेश्वरमधील पहला येथील एक भव्य दुमजली इमारत आणि अंदाजे १३० ग्रॅम सोने समाविष्ट आहे.
