‘ती छतावरून पडली…’ पत्नीच्या हत्येनंतर बीएसएफ जवानाने रचला बनाव; कुटुंबीयांच्या आरोपाने उडाली खळबळ

सुट्टीसाठी घरी आल्यानंतर वाद

रमाच्या कुटुंबीयांनी पोलिसांकडे दिलेल्या तक्रारीनुसार, अमरजीत सिंह १३ ऑगस्टच्या रात्री सुट्टीवर घरी परतला होता. त्यानंतर त्याने रमाला मारहाण केल्याचा आरोप आहे. या मारहाणीत गंभीर दुखापत झाल्यानंतर तिचा मृत्यू झाल्याचे कुटुंबीयांनी म्हटले आहे. मात्र, दुसऱ्या दिवशी पहाटे सुमारे ४ वाजता रमाच्या कुटुंबीयांना फोन करून ती छतावरून पडल्याचे सांगण्यात आले. तिला उपचारासाठी रुग्णालयात नेण्यात आल्याचेही त्यांना सांगण्यात आले. कुटुंबीय रुग्णालयात पोहोचले तेव्हा रमाचा मृत्यू झाल्याचे त्यांच्या निदर्शनास आले.

शरीरावर जखमांच्या खुणा

रमाच्या मृत्यूनंतर तिच्या कुटुंबीयांना तिच्या शरीरावर अनेक जखमांच्या खुणा दिसल्याचे त्यांनी पोलिसांना सांगितले. त्यामुळे तिचा छतावरून पडून मृत्यू झाला नसून तिच्यावर आधी मारहाण करण्यात आली असावी, असा संशय त्यांनी व्यक्त केला. कुटुंबीयांनी असा आरोप केला की, पत्नीच्या मृत्यूचे खरे कारण लपवण्यासाठी छतावरून पडल्याची कहाणी तयार करण्यात आली. रमाचे वडील रामचंद यांनी आपल्या मुलीला लग्नानंतरपासूनच पतीकडून मानसिक आणि शारीरिक त्रास दिला जात असल्याचा आरोप केला आहे.

पतीसह तिघांविरुद्ध गुन्हा

या प्रकरणी पोलिसांनी अमरजीत सिंह याच्यासह त्याचे काका कुलदीप कूकी आणि काकू सोनिया यांच्याविरोधात गुन्हा दाखल केला आहे. पोलिसांनी अमरजीत सिंहला अटक केली असून, इतर दोन्ही आरोपी फरार असल्याचे सांगण्यात आले आहे. त्यांचा शोध घेण्यासाठी पोलिसांकडून तपास सुरू आहे.

शवविच्छेदनानंतर मृतदेह कुटुंबीयांकडे

स्थानिक पोलिस स्टेशनचे अधिकारी हरप्रीत सिंह यांनी या प्रकरणाचा पुढील तपास सुरू असल्याचे सांगितले. रमाच्या मृत्यूचे नेमके कारण आणि घटनाक्रम स्पष्ट करण्यासाठी शवविच्छेदन करण्यात आले. शवविच्छेदनानंतर रमाचा मृतदेह तिच्या कुटुंबीयांच्या ताब्यात देण्यात आला असून, तिच्यावर तिच्या मूळ गावी अंत्यसंस्कार करण्यात येणार आहेत.