United States Central Command: युनायटेड स्टेट्स सेंट्रल कमांड (CENTCOM) ने मंगळवारी सांगितले की, अमेरिकन सैन्याने इस्लामिक रिव्होल्यूशनरी गार्ड कॉर्प्स (IRGC) शी संबंधित सुविधांसह इराणच्या प्रमुख लष्करी पायाभूत सुविधांवर सातत्याने कारवाई केली आहे.
‘एक्स’वरील पोस्टमध्ये CENTCOM ने म्हटले आहे की, “अमेरिकन सैन्याने सततच्या कारवायांदरम्यान इस्लामिक रिव्होल्यूशनरी गार्ड कॉर्प्सच्या कमांड अँड कंट्रोल सुविधांचा, इराणी हवाई संरक्षण व्यवस्थेचा, क्षेपणास्त्र आणि ड्रोन प्रक्षेपण स्थळांचा तसेच लष्करी हवाई तळांचा नाश केला आहे. इराणी राजवटीकडून निर्माण होणाऱ्या धोक्यांविरुद्ध आम्ही निर्णायक कारवाई करत राहू.”
बी-१ बॉम्बवर्षक विमानांनी हल्ले
‘सेंटकॉम’ने पुढे म्हटले आहे की, एफ/ए-१८ लढाऊ विमानांच्या अनेक तुकड्या इराणविरुद्धच्या सातत्यपूर्ण मोहिमांना पाठिंबा देत आहेत. अमेरिकन सैन्य प्रचंड अग्निशक्तीचा वापर करत दिवस-रात्र उड्डाण करत असल्याचेही त्यांनी नमूद केले. इराणच्या बॅलिस्टिक क्षेपणास्त्र क्षमतेला कमकुवत करण्यासाठी अमेरिकन बी-१ बॉम्बवर्षक विमानांनी इराणच्या आत खोलवर हल्ले केले. वॉशिंग्टन आणि तेहरान यांच्यात वाढत्या तणावाच्या पार्श्वभूमीवर ही कारवाई अधिक तीव्र करण्यात आली आहे.
अमेरिकन हवाई तळावर हल्ला
दरम्यान, ‘अल जझीरा’च्या वृत्तानुसार, इराणने बहरीनमधील अमेरिकन हवाई तळावर “मोठ्या प्रमाणात क्षेपणास्त्र आणि ड्रोन हल्ला” केल्याचा दावा केला आहे. इराणच्या आयआरजीसीने मंगळवारी पहाटे झालेल्या ड्रोन आणि क्षेपणास्त्र हल्ल्यात बहरीनमधील अमेरिकन हवाई तळाची मुख्य कमांड इमारत उद्ध्वस्त झाल्याचे म्हटले आहे. २० ड्रोन आणि ३ क्षेपणास्त्रांच्या मदतीने शेख इसा तळावर हल्ला करण्यात आला आणि इंधन टाक्यांना आग लागल्याचा दावा करण्यात आला आहे.
संयुक्त राष्ट्रांमधील इराणचे राजदूत अमीर सईद इरावनी यांनी सांगितले की, अमेरिका-इस्रायलची आक्रमक भूमिका कायम राहिल्यास इराण स्वतःचे संरक्षण निर्णायकपणे करत राहील.
या घडामोडींमध्ये इस्रायलने हिजबुल्लाहवर हल्ला चढवल्याने संघर्ष लेबनॉनपर्यंत विस्तारला आहे. इस्रायलने दावा केला आहे की, हिजबुल्लाहच्या गुप्तचर शाखेचा प्रमुख रात्रीच्या हल्ल्यात ठार झाला. आयडीएफने सांगितले की, संबंधित व्यक्ती हिजबुल्लाहसाठी विविध गुप्तचर साधनांच्या मदतीने माहिती संकलित करून इस्रायलविरोधी गुप्तचर मूल्यांकन तयार करण्याचे काम करत होता. तसेच, इस्रायली हवाई दलाने लेबनॉनमधून येणारे दोन मानवरहित ड्रोन अडवले.
