राम मंदिर ट्रस्टचा मोठा निर्णय! चोरीच्या आरोपांनंतर चंपत राय आणि अनिल मिश्रा यांचा राजीनामा मंजूर, अंतरिम सरचिटणीसांची नियुक्ती

श्रीरामजन्मभूमी तीर्थक्षेत्र ट्रस्टची बैठक दुपारी तीन वाजता रामजन्मभूमी संकुलातील विश्रामगृहात सुरू झाली. यावेळी ट्रस्टचे अध्यक्ष नृत्यगोपाल दास यांच्यासह नऊ स्थायी सदस्यांपैकी सात सदस्य उपस्थित होते, असं वृत्त पीटीआयने दिलं आहे.

नियमानुसार राजीनामा मंजूर केला

ट्रस्टच्या या बैठकीबद्दल राममंदिर ट्रस्टचे कोषाध्यक्ष स्वामी गोविंद देव गिरीजी महाराज यांनी प्रसारमाध्यमांना सांगितलं, “या प्रकारामुळे आम्ही सर्वजण दुःखी आणि व्यथित झालो आहोत. चोरी लहान आहे की मोठी, हा दुय्यम मुद्दा आहे; येथं असं वातावरण निर्माण होऊ दिलं गेलं, या मुख्य गोष्टीचं आम्हांला दुःख आहे. परंतु, सत्य आपल्यासमोर आहे आणि त्यावर चिंतन करणं आमचं कर्तव्य आहे. सध्याची परिस्थिती पाहता, एक गंभीर परिस्थिती निर्माण झाली, सरचिटणीस चंपत राय आणि विश्वस्त अनिल मिश्रा यांनी राजीनामे सादर केले. सरचिटणीस म्हणून कार्यरत असलेले चंपत राय कमालीचे दुःखी होते; जोपर्यंत पूर्ण न्याय मिळत नाही म्हणजेच गुन्हेगार पकडले जात नाहीत आणि त्यांना योग्य शिक्षा होत नाही, तोपर्यंत आपल्या पदावर राहणं त्यांना अयोग्य वाटलं. याच भावनेने प्रेरित होऊन त्यांनी आपला राजीनामा दिला. जी गोष्ट स्वीकारणे किंवा नाकारणे केवळ आमच्या हातात नव्हते. के. परासरन यांनी एक महत्त्वाचा मुद्दा मांडला, ट्रस्टच्या घटनेनुसार, राजीनामा सादर केल्या क्षणापासूनच तो मंजूर मानला जातो.”

देणगी वादामुळे बैठक ठरलेल्या वेळेआधी घेण्यात आली

गोविंद गिरी यांनी सांगितलं की, ट्रस्टने मूळ नियोजनानुसार ११ जुलै रोजी बैठक घेण्याचं ठरवलं होतं. परंतु, देणगी चोरी प्रकरणातील घडामोडी लक्षात घेऊन ही बैठक ठरलेल्या वेळेपूर्वी घेण्याचा निर्णय घेण्यात आला. “ट्रस्टची नियोजित बैठक (जी मूळची ११ जुलै रोजी होणार होती) शक्य तितक्या लवकर घेण्याचा निर्णय घेण्यात आला; परिणामी, सर्वांशी माहिती सामायिक करून, आम्ही आज ६ जुलै रोजी ही बैठक बोलावली,” असे ते म्हणाले.