Chirag Paswan Bihar Law and Order critique : लोक जनशक्ती पक्ष (रामविलास) चे प्रमुख आणि बिहारमधील राष्ट्रीय लोकशाही आघाडीचे (NDA) मित्रपक्ष असलेले केंद्रीय मंत्री चिराग पासवान यांनी राज्यातील ढासळत्या कायदा आणि सुव्यवस्थेबद्दल, विशेषतः महिलांवरील गुन्ह्यांबद्दल तीव्र संताप व्यक्त केला आहे. त्यांनी उघडपणे म्हटलं आहे की, सध्याच्या परिस्थितीमुळे त्यांना बिहार सरकारला पाठिंबा देण्याच्या त्यांच्या राजकीय भूमिकेवर प्रश्नचिन्ह निर्माण झाले आहे.
पाटण्यातील एका शासकीय इमारतीबाहेर माध्यमांशी बोलताना चिराग पासवान म्हणाले, “अशा घटना घडत असलेल्या सरकारचा मी एक भाग आहे, याबद्दल मला लाज वाटते.” सार्वजनिक ठिकाणी तरुण महिलांचा छळ आणि त्यांच्यावर होणाऱ्या हल्ल्यांचे अलीकडचे व्हिडिओ आणि अहवाल ‘अत्यंत लज्जास्पद’ आणि ‘अतीव चिंतेची बाब’ असल्याचे त्यांनी म्हटले आहे. एलजेपी (आरव्ही) नेत्याने इशारा दिला की, जर अशा घटनांवर तात्काळ नियंत्रण मिळवले नाही, तर बिहार पुन्हा एकदा जंगलराजकडे सरकू शकतो. गुन्हेगार इतके धाडसी झाले आहेत की ते भरदिवसा गुन्हे करत आहेत, असा युक्तिवाद त्यांनी केला. पासवान म्हणाले, “सार्वजनिक ठिकाणी अशा प्रकारची कृत्ये करण्याचे धाडस गुन्हेगारांमध्ये निर्माण झाले आहे आणि त्यांचे मनोबल इतके वाढले आहे, ही आपल्या सर्वांसाठी गंभीर चिंतेची बाब आहे.”
समस्तीपूर, जमुई आणि इतर जिल्ह्यांमध्ये अल्पवयीन मुलींचा झालेला विनयभंग आणि त्यांच्यावरील हल्ल्यांच्या कथित घटनांनंतर पासवान यांनी हे वक्तव्य केले आहे. या घटनांचे व्हिडिओ सोशल मीडियावर मोठ्या प्रमाणात व्हायरल झाले होते. पासवान यांनी याप्रकरणी केवळ अटकेची मागणी केली नाही, तर ज्यांच्या कार्यक्षेत्रात अशा घटना घडतात त्या पोलीस आणि प्रशासकीय अधिकाऱ्यांनाही जबाबदार धरण्याची मागणी केली आहे. ते म्हणाले, “केवळ अटक किंवा एन्काउंटर पुरेसे ठरणार नाही. ज्या अधिकाऱ्यांच्या उपस्थितीत अशा लज्जास्पद घटना घडतात आणि जे त्या रोखण्यात अपयशी ठरतात, त्यांचीही जबाबदारी निश्चित केली पाहिजे.”
पासवान यांनी या मुद्द्यावर बिहारचे मुख्यमंत्री सम्राट चौधरी यांच्याशी चर्चा केल्याचे सांगितले आणि महिलांवरील गुन्ह्यांबाबत ‘झिरो टॉलरन्स’ (शून्य सहनशीलता) धोरण अवलंबण्याचे आवाहन केले. “अशा प्रकारची एक जरी घटना घडली, तरी सरकारने ती अत्यंत गंभीर बाब म्हणून हाताळली पाहिजे,” असेही ते म्हणाले.
या विधानामुळे बिहारच्या राजकारणात मोठी खळबळ उडाली आहे. काँग्रेस आणि इतर विरोधी पक्षांनी पासवान यांना आव्हान दिलं आहे की, जर त्यांना खरोखरच सरकारची लाज वाटत असेल, तर त्यांनी एनडीएचा पाठिंबा काढून घ्यावा. तर दुसरीकडे, आघाडीमधील जेडीयू (JD-U) नेत्यांनी पलटवार करत म्हटलं आहे की, जर पासवान यांना एनडीएमध्ये अस्वस्थ वाटत असेल, तर ते ‘डागाळलेल्या लोकांसोबत’ जाण्यास मोकळे आहेत. भाजपने मात्र या संपूर्ण प्रकरणावर अद्याप सावध भूमिका घेतली आहे.
