तमिळनाडूच्या राजकारणात एका नव्या युगाची सुरुवात झाली आहे. राज्याचे नवनियुक्त मुख्यमंत्री सी. जोसेफ विजय यांनी सोमवारी माजी मुख्यमंत्री आणि द्रमुक प्रमुख एम.के. स्टालिन यांची त्यांच्या निवासस्थानी जाऊन भेट घेतली. विधानसभा निवडणुकीतील अभूतपूर्व विजयानंतर आणि मुख्यमंत्रीपदाची शपथ घेतल्याच्या दुसऱ्याच दिवशी झालेली ही भेट राज्याच्या राजकीय वर्तुळात चर्चेचा विषय ठरली आहे. सत्ताधारी आणि विरोधक यांच्यातील या सौहार्दपूर्ण भेटीचे समाज माध्यमांवर कौतुक केले जात आहे.
गळाभेट आणि जंगी स्वागत
अभिनेते ते राजकारणी असा प्रवास करणाऱ्या विजय यांनी रविवारी मुख्यमंत्रीपदाची शपथ घेतली. त्यानंतर सोमवारी त्यांनी स्टालिन यांच्या चेन्नईतील ‘आळवारपेट’ येथील निवासस्थानी सदिच्छा भेट दिली. यावेळी एम.के. स्टालिन आणि त्यांचे पुत्र उदयनिधी स्टालिन यांनी विजय यांचे मनापासून स्वागत केले.
भेटीच्या सुरुवातीला विजय यांनी स्टालिन यांना हात जोडून अभिवादन केले, ज्याला स्टालिन यांनीही तितक्याच आदराने प्रतिसाद दिला. त्यानंतर दोन्ही नेत्यांनी एकमेकांची गळाभेट घेऊन शुभेच्छा दिल्या. एका अनुभवी नेत्याचा आणि एका नव्या दमाच्या मुख्यमंत्र्यांचा हा स्नेह पाहून सोशल मीडियावर या भेटीचे फोटो मोठ्या प्रमाणात व्हायरल होत आहेत.
औपचारिक भेट की राजकीय सदिच्छा भेट?
या भेटीला प्रामुख्याने ‘सदिच्छा भेट’ असे स्वरूप देण्यात आले आहे. मुख्यमंत्री झाल्यानंतरची ही स्टालिन यांच्याशी झालेली विजय यांची पहिलीच भेट होती. यावेळी विजय यांनी औपचारिक पोषाख परिधान केला होता, तर स्टालिन यांनी त्यांच्या पारंपारिक पेहरावात त्यांचे स्वागत केले. भेटीदरम्यान दोन्ही नेत्यांनी परंपरेनुसार एकमेकांना रेशमी शाली आणि पुष्पगुच्छ देऊन सन्मानित केले. यावेळी मागील सरकारमध्ये उपमुख्यमंत्री राहिलेले उदयनिधी स्टालिन यांची उपस्थितीही लक्षणीय होती.
विजयानंतरचे नवे समीकरण
नुकत्याच पार पडलेल्या विधानसभा निवडणुकीत विजय यांच्या पक्षाने ऐतिहासिक यश मिळवून द्रमुकची सत्ता उलथवून लावली आहे. मात्र, राजकीय मतभेद बाजूला ठेवून प्रशासकीय कामकाजाची सुरुवात करताना माजी मुख्यमंत्र्यांचा सल्ला किंवा सदिच्छ भेट घेणे ही तमिळनाडूच्या राजकीय संस्कृतीतील एक महत्त्वाची बाब मानली जात आहे.
“निवडणुकीतील जय-पराजय हा लोकशाहीचा भाग आहे, मात्र राज्याच्या विकासासाठी सर्व नेत्यांनी एकत्र येणे गरजेचे आहे,” असा संदेश या भेटीतून गेल्याची चर्चा राजकीय वर्तुळात रंगली आहे. विजय यांनी आपल्या कारकिर्दीची सुरुवात अशा संयमी आणि आदरयुक्त भेटीने केल्यामुळे त्यांच्या समर्थकांमध्ये उत्साहाचे वातावरण आहे.
