महिन्याभरानंतर कॉक्रोच जनता पार्टीचं आंदोलन मागे; जंतरमंतरहून माघारी फिरण्याचं तरुणाईला आवाहन!

तिसऱ्या बैठकीत सरकारकडून मागण्या मान्य

नीट पेपरफुटीप्रकरणी कॉक्रोच जनता पार्टीकडून गेल्या ३६ दिवसांपासून दिल्लीत जंतर मंतरवर आंदोलन केले जात होते. सामाजिक कार्यकर्ते सोनम वांगचुक यांनी या आंदोलनाला समर्थन देत उपोषणाची घोषणा केल्यानंतर याला वेगळी धार चढली. प्रधान यांच्या राजीनाम्याची प्रमुख मागणीपुढे अखेर सरकार झुकलं आणि आज प्रधान यांनी शिक्षणमंत्रीपदाचा राजीनामा दिला. यानंतर कॉक्रोच जनता पार्टीचे शिष्टमंडळ आणि केंद्र सरकारच्या मंत्र्यांसोबत तिसरी बैठक पार पडली. या बैठीत सीजेपीकडून इतर दोन मागण्याही ठेवण्यात आल्या. या मागण्या सरकारने मान्य केल्याचे संयुक्त पत्रकार परिषदेतून जाहीर करण्यात आले.

दोन्ही मागण्या मान्य

आंदोलनादरम्यान केवळ दिल्लीतच नव्हे तर भाजपाशासित राज्यात आंदोलकांवर दाखल झालेले गुन्हे मागे घेण्याची मागणी सीजेपीने केली होती. सरकारने ही मागणी मान्य केली आहे. एफआयआरच्या कॉपी सीजेपीला देण्यासही सरकारने तयारी दर्शवली आहे. शिवाय भविष्यात देखील कारवाई केली जाणार नाही, असे सरकारने आश्वस्त केले आहे, अशी माहिती सीजेपीचे प्रवक्ते सौरव दास आणि आशुतोष रांका यांनी संयुक्त पत्रकार परिषदेत दिले. तसेच, आत्महत्या केलेल्या विद्यार्थ्यांच्या कुटुंबीयांना नुकसान भरभाई देण्याचे मान्य केल्याचे यावेळी स्पष्ट करण्यात आले.

शिक्षण व्यवस्था आणि परीक्षा सुधारणांवर चर्चा

आत्महत्या केलेल्या विद्यार्थ्यांच्या कुटुंबीयांना एक कोटी नुकसान भरभाई देण्याची मागणी कॉक्रोच जनता पार्टीकडून करण्यात आली होती. याबाबत बोलताना दास यांनी सांगितले की, नुकसान भरपाई देण्यास सरकार तयार आहे. यासाठी शासकीय नियमांनुसार भरपाई दिली जाईल, असे सरकारने सांगितले आहे. तसेच, सीजेपीकडून शिक्षण व्यवस्था आणि परीक्षा सुधारणांवर चर्चेची मागणी करण्यात आली असून, सरकार यासाठी देखील सकारात्मक असल्याचे रांका यांनी सांगितले.