‘मी साधासुधा चौकीदार नाही, अंबानींचा दरबान’ काँग्रेसचा पुन्हा मोदीविरोधी ट्विट

राफेल करारावरून पुन्हा एकदा काँग्रेसची पंतप्रधान नरेंद्र मोदी यांच्यावर व्यंगचित्राच्या माध्यमातून टीका

राफेल करारावरून सुरु झालेले आरोप प्रत्यारोप थांबताना दिसत नाहीत. पुन्हा एकदा काँग्रेसने पंतप्रधान नरेंद्र मोदींना लक्ष्य केले आहे. ट्विटर या सोशल नेटवर्किंग साइटवर पंतप्रधान नरेंद्र मोदी यांच्याबद्दलचे एक व्यंगचित्र काँग्रेसने ट्विट केले आहे. या व्यंगचित्रात मोदी सांगतात मला साधासुधा चौकीदार नाही तर अंबानींचा दरबान समजा. अनिल अंबानी त्यांना पाहून पुढे जात आहेत असेही या व्यंगचित्रात दाखवण्यात आले आहे. ‘राफेल उड न पाया दोस्त हुआ है मालदार, देश की जनता जान गयी है, चुप क्यों है चोरो का सरदार’ असा मथळा देऊन काँग्रेसने पुन्हा एकदा पंतप्रधान नरेंद्र मोदींवर टीका केली आहे.

राफेल करारात पंतप्रधान नरेंद्र मोदी यांनी अनिल अंबानींचा फायदा करून दिला. त्यांनी या करारात त्यांना हवे तसे फेरबदल केले असा आरोप काँग्रेस अध्यक्ष राहुल गांधी यांनी केला. एवढेच नाही तर त्यांना आजच पंतप्रधान नरेंद्र मोदी हे चोरांचे सरदार आहेत अशीही टीका त्यांनी केली होती. त्यानंतर आता काँग्रेसने आपल्या अधिकृत ट्विटर हँडलवर हे व्यंगचित्र पोस्ट केले आहे. मी साधासुधा चौकीदार नाही तर अंबानींचा दरबान आहे असे या व्यंगचित्रात दाखवण्यात आले आहे. एकीकडे राफेल विमान दुसरीकडे रिलायन्स समूहाची बॅग घेतलेले अंबानी आणि त्यांना सलाम करणारे दरबानाच्या वेशातले मोदी असे या व्यंगचित्रात दाखवण्यात आले आहे. त्यामुळे आता यावरून भाजपा पुन्हा एकदा काँग्रेसला प्रत्युत्तर देणार हे नक्की आहे.

याआधी कर्जबुडव्या विजय मल्ल्याबाबतही काँग्रेसने एक व्यंगचित्र पोस्ट केले होते. आता पुन्हा एकदा राफेल कराराच्या मुद्द्यावरून त्यांनी टीका केली आहे. यावरून पुन्हा एकदा भाजपा आणि काँग्रेस यांच्यात ट्विटर वॉर रंगू शकते.

 

 

 

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व देश-विदेश बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Congress tweets cartoon against narendra modi on rafale deal