नवी दिल्ली  : देशातील उपचाराधीन रुग्णांत सातत्याने घट होत आहे. गेल्या २४८ दिवसांतील सर्वात कमी उपचाराधीन रुग्णसंख्या रविवारी नोंदली गेली आहे. १ लाख ५८ हजार ८१७ रुग्णसंख्या नोंदली गेली असून ही संख्या एकूण रुग्णसंख्येच्या ०.४६ टक्के इतकी आहे. ही टक्केवारी मार्च २०२० नंतर इतकी कमी नोंदली गेली आहे. तर करोनामुक्त होण्याची टक्केवारी देखील ९८.२० इतकी झाली असल्याचे केंद्रीय आरोग्य मंत्रालयाने सोमवारी जाहीर केले आहे.

गेल्या २४ तासांत १२,५१४ रुग्णांची नोंद झाली तर २५१जणांचा मृत्यू झाला आहे. सलग २४ दिवसांपासून दैनंदिन रुग्णसंख्या ही २० हजारांखाली तर सलग १२७ दिवसांपासून ५० हजारांखाली नोंदल्याचे केंद्रीय आरोग्य मंत्रालयाने जाहीर केलेल्या आकडेवारीत म्हटले आहे.

 गेल्या २४ तासांत  सक्रिय रुग्णांमध्ये ४५५ ने घट झाली आहे. 

देशभरात आतापर्यंत एकूण ३ कोटी ४२ लाख ८५ हजार ८१४ जणांना करोनाची लागण झाली आहे. तर करोनाबळींची एकूण संख्या ४ लाख ५८ हजार ४३७ झाली आहे. तर मृत्यू दर १.३३ टक्के नोंदला गेला आहे.

आतापर्यंत ३ कोटी ३६ लाख ६८ हजार ५६० जण करोनामुक्त झाले आहेत. रविवारी ८ लाख ८१ हजार ३७९ चाचण्या करण्यात आल्या असून आतापर्यंत एकूण ६० कोटी ९२ लाख ०१ हजार २९४ चाचण्या करण्यात आल्या आहेत.  दैनंदिन रुग्णवाढीचा दर १.४२ टक्के इतका नोंदला असून गेल्या २८ दिवसांपासून रुग्णवाढीचा दर २ टक्क्यांहून कमी नोंदला गेला आहे. साप्ताहिक रुग्णवाढीचा दर १.१७  टक्के नोंदला आहे. सलग ३८ दिवसांपासून साप्ताहिक रुग्णवाढीचा दर २ टक्क्यांहून कमी नोंदला गेला आहे. भारतात लसीकरण झालेल्यांची संख्या १०६.३१ कोटी झाली आहे.