Ghaziabad Suicide Case: ‘पत्नीलाही सोबत घेऊन जातोय’ म्हणत दिल्ली एनसीआरमध्ये व्यावसायिकाची आत्महत्या; सुसाईड नोटमध्ये लिहिलं ‘हे’ कारण

नेमकं काय घडलं गाझियाबादमध्ये?

गाझियाबादमध्ये आपल्या दोन मुलांसह राहणाऱ्या कुलदीप त्यागी (४६) व अंशू त्यागी (४३) या दाम्पत्यानं बुधवारी सकाळी ११ च्या सुमारास राहत्या घरी आत्महत्या केली. कुलदीप त्यागी यांनी आधी त्यांच्या पत्नीला गोळ्या झाडल्या व स्वत: नंतर आत्महत्या केली. गाझियाबादच्या राज नगर परिसरातील राधा कुंज सोसायटीमध्ये हे दाम्पत्य राहात होतं. यासंदर्भात गाझियाबात पोलिसांनी माध्यमांना माहिती दिली.

“कुलदीप त्यागी यांची दोन मुलं व त्यांचे वडील घटना घडली तेव्हा घरात दुसऱ्या मजल्यावर उपस्थित होते. त्यागी यांनी पहिल्या मजल्यावर पत्नीला व स्वत:ला गोळ्या झाडून घेतल्यानंतर तो आवाज ऐकून कुटुंबीयांनी खालच्या मजल्यावर धाव घेतली. त्यावेळी कुलदीप खाली फर्शीवर कोसळले होते तर अंशू बेडवर पडल्या होत्या. कुटुंबीयांनी लागलीच त्यांना नजीकच्या रुग्णालयात दाखल केलं. पण डॉक्टरांनी त्यांना मृत घोषित केलं”, अशी माहिती गाझियाबाद पोलिसांकडून देण्यात आली आहे.

सुसाईड नोटमध्ये धक्कादायक खुलासा

दरम्यान, कुलदीप यांनी आत्महत्या करण्यापूर्वी लिहिलेल्या सुसाईड नोटमध्ये आत्महत्येचं कारण नमूद केलं आहे. नंदग्रामच्या सहाय्यक पोलीस आयुक्त पूनम मिश्रा यांनी इंडियन एक्स्प्रेसला यासंदर्भात माहिती दिली आहे. या सुसाईड नोटमध्ये कुलदीप यांना कर्करोग झाला होता व कुटुंबीयांना यासंदर्भात माहिती नव्हती, ही बाब समोर आली आहे. “आपल्या उपचारांवर पैसा खर्च व्हावा असं त्यांना वाटत नव्हतं. त्यामुळे पत्नीसह आत्महत्या करत असल्याचं त्यांनी सुसाईड नोटमध्ये म्हटलं आहे”, अशी माहिती मिश्रा यांनी दिली.

काय लिहिलंय सुसाईड नोटमध्ये?

कुलदीप त्यागी यांनी सुसाईड नोटमध्ये आत्महत्येचा निर्णय आपला स्वत:चा असून त्यासाठी कुणालाही जबाबदार धरलं जाऊ नये, असं म्हटलं आहे. “मला कर्करोग झाला आहे. पण माझ्या कुटुंबीयांना याबाबत माहिती नाही. उपचारांनंतरही मी वाचू शकणार नाही. त्यामुळे मला माझ्या उपचारांवर पैसे खर्च व्हायला नको आहेत. त्यामुळे मी स्वत:ला संपवतो आहे. माझी पत्नी व मी कायम सोबत राहण्याचं वचन एकमेकांना दिलं होतं. त्यामुळे मी माझ्या पत्नीलाही सोबत घेऊन जात आहे”, असं या सुसाईड नोटमध्ये म्हटलं आहे.

“हा माझा स्वत:चा निर्णय आहे. कुणीही, विशेषत: माझी मुलं, माझ्या या निर्णयासाठी जबाबदार नाहीत”, असंही या नोटमध्ये कुलदीप त्यागी यांनी लिहून ठेवलं आहे.

पोलिसांचा तपास काय सांगतो?

दरम्यान, ही सुसाईड नोट कुलदीप त्यागींनीच लिहिली आहे का? यासंदर्भात पोलीस तपास करत आहेत. शिवाय, त्यांना कर्करोग होता की नाही? याबाबतही खात्री करून घेण्यासाठी तपास चालू असल्याचं पूनम मिश्रा यांनी सांगितलं. यासंदर्भात कुलदीप त्यागी यांच्या उपचारांशी निगडित काही कागदपत्र त्यांच्या खोलीत सापडल्याचं त्या म्हणाल्या.