चेन, स्क्रू आणि ब्लेडच्या तुकड्यांसह तब्बल ६५ वस्तू गिळल्याने उत्तरप्रदेशच्या हाथरस येथील १४ वर्षीय मुलाचा मृत्यू झाल्याचा धक्कादायक प्रकार उघडकीस आला आहे. दिल्लीतील सफदरजंग रुग्णालयात पाच तास शस्त्रक्रिया पार पडल्यानंतर डॉक्टरांनी मुलाच्या पोटातून या वस्तू बाहेर काढल्या. पणउपाचारादरम्यान मुलाचा मृत्यू झाला. आदित्य शर्मा असं या मुलाचं नाव आहे.
टाईम्स ऑफ इंडियाने दिलेल्या वृत्तानुसार, आदित्यने १३ ऑक्टोबर रोजी त्याला श्वास घेताना त्रास होत असल्याचं त्याच्या वडिलांना सांगितलं. त्यानंतर त्याच्या वडिलांनी त्याला आग्रातील एका रुग्णालयात दाखल केलं. मात्र, रुग्णालयातून घरी आल्यानंतर त्याला पुन्हा त्रास सुरु झाला. त्यामुळे त्याच्या वडिलांनी त्याला जयपूरमधील एका रुग्णालयात दाखल केलं. मात्र, तिथेही निदान न झाल्याने त्यांनी त्याला अलीगढमधील एका रुग्णालयात नेलं.
अलीगढमध्ये डॉक्टरांनी त्याचे सीटी स्कॅन केल्यानंतर श्वसननलिकेत ब्लॉकेज असल्याचे आढळून आलं. त्याच रुग्णालयात त्याच्यावर शस्त्रक्रियाही करण्यात आली. मात्र, दोन-तीन दिवसांनी पोट दुखू लागल्याने त्याची अल्ट्रासाऊंड चाचणी करण्यात आली. त्यात मुलाच्या पोटात १९ वस्तू असल्याचे आढळून आलं. त्यामुळे डॉक्टरांनी त्याला नोएडा येथील रुग्णालयात जाण्याचा सल्ला दिला.
नोएडा येथील एका खासगी रुग्णालायात दाखल केल्यानंतर त्याची पुन्हा एकदा अल्ट्रासाऊंड चाचणी करण्यात आली. यावेळी डॉक्टरांनी मुलाच्या पोटात ४९ वस्तू असल्याचे सांगितलं. तसेच त्याला दिल्लीतील सफदरजंग रुग्णालयात रेफर करण्यात आलं. तिथे पुन्हा अल्ट्रासाऊंड चाचणी केल्यानंतर मुलाच्या पोटात ६५ वस्तू असल्याचे डॉक्टरांनी स्पष्ट केलं.
हेही वाचा – धक्कादायक! फटाक्यामुळे धावत्या रिक्षाला लागली भररस्त्यात आग, संभाजीनगरचा VIDEO होतोय व्हायरल
दरम्यान, डॉक्टरांनी त्याच्यावर पाच तास शस्त्रक्रीया करत या वस्तू बाहेर काढण्याचा प्रयत्न केला. मात्र, उपाचारादरम्यान पोटात इन्फेक्शन झाल्याने त्याचा मृत्यू झाला. यासंदर्भात बोलताना मुलाने लहानपणी या वस्तू गिळल्या असाव्यात, असं डॉक्टरांनी सांगितलं.
