वॉशिंग्टन: एकीकडे इराणसोबत सुरू असलेले युद्ध आणि दुसरीकडे स्वतःच्याच मुलाचे लग्न, अशा दुहेरी कात्रीत अमेरिकेचे राष्ट्राध्यक्ष डोनाल्ड ट्रम्प सध्या अडकले आहेत. इराणसोबत सुरू असलेल्या युद्धाच्या पार्श्वभूमीवर, आपण कदाचित आपल्या मोठ्या मुलाच्या लग्नाला उपस्थित राहू शकणार नाही, असे संकेत ट्रम्प यांनी दिले आहेत. “सध्याची वेळ यासाठी अजिबात योग्य नाही,” अशा शब्दांत त्यांनी आपली अडचण जाहीरपणे व्यक्त केली.

व्हाईट हाऊसमध्ये पत्रकारांशी संवाद साधताना ट्रम्प यांनी ही माहिती दिली. इराणसोबतच्या गंभीर संघर्षामुळे उद्भवलेल्या परिस्थितीचा उल्लेख करत, आपण या लग्नसोहळ्याला जाण्याचा प्रयत्न करू, पण नक्की सांगू शकत नाही, असे ट्रम्प म्हणाले.

‘माझ्यासाठी ही योग्य वेळ नाही!’

डोनाल्ड ट्रम्प यांचे मोठे चिरंजीव डोनाल्ड ट्रम्प ज्युनियर (वय ४८ वर्ष) हे या वीकेंडला बहामास येथे बेटिना अँडरसन यांच्याशी विवाहबंधनात अडकणार आहेत. अमेरिकन माध्यमांनुसार हा ट्रम्प ज्युनियर यांचा दुसरा विवाह असून, हा अत्यंत खाजगी स्वरूपाचा कौटुंबिक सोहळा असणार आहे.

या सोहळ्याविषयी एका व्हिडिओ संवादात बोलताना राष्ट्राध्यक्ष ट्रम्प म्हणाले:

“माझ्या मुलाची इच्छा आहे की मी या लग्नाला यावे. हा अतिशय लहान आणि खाजगी स्वरूपाचा कार्यक्रम आहे. मी तिथे पोहोचण्याचा नक्कीच प्रयत्न करेन. पण मी त्याला आधीच सांगितले आहे की, माझ्यासाठी ही वेळ अजिबात चांगली नाही. सध्या माझ्यासमोर इराणचे युद्ध आणि इतर अनेक महत्त्वाचे राष्ट्रीय मुद्दे आहेत.”

हेही वाचा

मीडियाच्या भूमिकेवर ट्रम्प नाराज

आपल्या या निर्णयाचा जनतेवर आणि माध्यमांवर काय परिणाम होईल, याविषयीही ट्रम्प यांनी चिंता व्यक्त केली. इराणसोबतचा संघर्ष शिगेला पोहोचलेला असताना कौटुंबिक कार्यक्रमाला उपस्थित राहणे राजकीयदृष्ट्या योग्य दिसेल का, असा प्रश्न त्यांच्यासमोर आहे.

आपली नाराजी व्यक्त करताना ट्रम्प पुढे म्हणाले, “या परिस्थितीत मी कोणताही निर्णय घेतला, तरी कोंडी माझीच होणार आहे. जर मी लग्नाला गेलो, तर विरोधक माझ्यावर टीका करतील. आणि जर मी गेलो नाही, तर ‘फेक न्यूज’ पसरवणारे माध्यम माझ्यावर तुटून पडतील.”

निवडणुकांच्या तोंडावर इराण युद्धाचे सावट

सध्या अमेरिका आणि इराण यांच्यात तीव्र संघर्ष सुरू असून, ट्रम्प प्रशासन यावर तोडगा काढण्यासाठी आणि संभाव्य करारासाठी प्रयत्नशील आहे. दुसरीकडे, अमेरिकेत आगामी ‘मिडटर्म’ (मध्यावधी) निवडणुका तोंडावर असल्याने या संपूर्ण प्रकरणाला मोठे राजकीय महत्त्व प्राप्त झाले आहे. या आंतरराष्ट्रीय तणावाच्या काळात राष्ट्राध्यक्षांनी देशात उपस्थित राहणे गरजेचे मानले जात आहे.

सध्याच्या या अनिश्चिततेच्या वातावरणातही ट्रम्प यांनी आपल्या मुलाला शुभेच्छा दिल्या. “त्यांचे वैवाहिक जीवन उत्तम आणि सुखाचे जावो, हीच माझी इच्छा आहे,” अशा भावना व्यक्त करत त्यांनी शुभेच्छा दिल्या.