अमेरिकेचे माजी राष्ट्राध्यक्ष डोनाल्ड ट्रम्प यांनी स्वत:चा सोशल मीडिया प्लॅटफॉर्म सुरु करण्याची घोषणा केली होती. त्याप्रमाणे 'ट्रुथ सोशल' (Truth Social) हे त्यांचं नवं अॅप फेब्रुवारी महिन्यात लाँच होणार आहे. २१ फेब्रुवारीपासून 'ट्रुथ सोशल' अॅप स्टोअरवर उपलब्ध असेल. हे अॅप ट्रम्प मीडिया अँड टेक्नॉलॉजी ग्रुप (TMTG) द्वारे बनवले जात आहे. डोनाल्ड ट्रम्प यांची ही नवीन मीडिया कंपनी अमेरिकेचे माजी रिपब्लिकन डेव्हिन नुनेस यांच्या नेतृत्वाखाली आहे. ट्रुथ सोशल अॅप हे ट्विटर (Twitter) या सोशल मीडिया प्लॅटफॉर्मसारखंच दिसत आहे. प्रोफाइल पेज जवळजवळ ट्विटर अॅपसारखे दिसत आहे आणि पोस्टमध्ये प्रत्युत्तरे, रीट्विट्स, पसंती आणि शेअरिंगसाठी चिन्हे दिसत आहेत. ज्यांनी माझ्यावर बंदी घातली अशा बिग टेक कंपनींच्या विरोधात लढा देण्यासाठी आपण ट्रुथ सोशल मीडिया तयार केल्याचं ट्रम्प यांनी सांगितलं होतं. आम्ही अशा जगात राहतो जिथे तालिबान ट्विटरवर मोठ्या प्रमाणात सक्रीय आहे, तरीही तुमचे आवडते अमेरिकी अध्यक्ष शांत बसले आहेत, अशी खोचक टीकाही ट्रम्प यांनी त्यावेळी केली होती. ट्रम्प यांचं हे नवं अॅप २१ फेब्रुवारीपासून 'ट्रुथ सोशल' वेब आणि Android वर उपलब्ध असेल. तुम्ही ट्रुथ सोशलच्या वेबसाईटला आता भेट दिल्यास, अॅप स्टोअरवर तुम्हाला अॅपसाठी पूर्व नोंदणी करता येईल. ट्रुथ सोशल अॅप हे पहिल्या टप्प्यात केवळ फक्त आमंत्रित व्यक्तिंसाठीच लाँच केले आहे. ट्रम्प यांनी डिसेंबरच्या घोषणेचा एक भाग म्हणून TMTG च्या व्हिडिओ शेअरिंग साईट 'रंबल' (Rumble) च्या भागीदारीबद्दल सांगितले. रंबल ट्रुथ सोशल अॅपसाठी व्हिडिओ आणि स्ट्रीमिंग तंत्रज्ञान प्रदान करेल. ट्रम्प यांच्या 6 जानेवारीच्या बंडानंतर लगेचच जानेवारी २०२१ मध्ये त्यांच्यावर ट्विटरकडून कायमची बंदी घालण्यात आली आहे. त्यानंतर मेमध्ये ट्रम्प यांनी आपला ब्लॉगही सुरू करण्याचा प्रयत्न केला. मात्र काही दिवसांमध्येच हा ब्लॉगही बंद पडला. त्यानंतर ऑक्टोबरमध्ये ट्रम्प यांचं ट्वीटर खातं पुन्हा सुरू करण्याचा प्रयत्न केल्याप्रकरणी ट्वीटरवर खटलाही दाखल झाला होता.
