बिहारमध्ये क्रूर अशी घटना समोर आली आहे. गया जिल्ह्यात एका पित्याने आपल्या ४ महिन्यांच्या जुळ्या मुलांचा निर्घृण खून केला आहे. यानंतर आरोपी पिता फरार झाला आहे. ही घटना समोर आल्यानंतर परिसरातून एकच हळहळ व्यक्त करण्यात येत आहे. घटनेची माहिती झाल्यानंतर पोलीस आरोपी पित्याचा शोध घेत आहेत. थरकाप उडवणारी ही घटना गया जिल्ह्यातील मगध कॉलनी येथील आहे. मगध कॉलनीतील रोड क्रमांक ४ आणि ५ येथे देवेश शर्मा हा आपल्या कुटुंबाबरोबर राहत होता. देवेश हा रिक्षा चालवत असे. बायको राणी शर्माने सांगितल्यानुसार, देवेश हा दारूच्या आहारी गेला होता. तसेच, अलीकडील काही दिवसांपासून तो दारू पिऊन घरी भांडण करायचा. हेही वाचा : लग्नानंतर वर्षभरात नवऱ्याने कधीच शारिरीक संबंध बनवले नाहीत, पत्नीची पोलिसात धाव; म्हणाली, “मी जवळ गेल्यावर तो…” मुलांच्या खून केला त्यादिवशीही देवेश दारू पिऊन वाद घालत होता. राणी शर्माने म्हटलं की, भांडण सुरू असतानाच देवेशने मुलांना आपटलं. यामध्ये दोघांचा मृत्यू झाला. मुलांच्या खूनानंतर देवेश घरातून पळून गेला. घटनेनंतर राणी शर्माने पोलिसांना याप्रकरणाची माहिती दिली. पोलिसांनी तातडीने घटनास्थळी धाव घेत, दोन्ही मुलांचा मृतदेह शवविच्छेदनासाठी नारायण मगध मेडिकल कॉलेजमध्ये पाठवला. हेही वाचा : रात्री नातवाला पडलं भयानक स्वप्न, सकाळी उठल्यावर केली आजी-आजोबांची हत्या, नेमकं प्रकरण काय? याप्रकरणी मगध मेडिकलचे पोलीस अधिकारी शैलेस कुमार यांनी सांगितलं, "पती-पत्नीमध्ये वाद झाला होता. त्यातच देवेशने आपल्या जुळ्या मुलांचा खून केला आहे. देवेश अद्याप फरार असून, लवकरच त्याला अटक करण्यात येईल." 'आज तक'ने याबाबत वृत्त दिलं आहे.
