फ्लायदुबई विमानात स्मित मच्छार यांच्यावर हल्ला करणाऱ्या सहवैमानिकाची ओळख पटली; ओमानमध्ये आधीच घातली होती बंदी

सौदी अरेबियातील वृत्तवाहिनी अल अरेबियाने सूत्रांच्या हवाल्याने या सहवैमानिकाची ओमानी नागरिक हमाम अल-हम्मामी अशी ओळख पटवली आहे. वॉल स्ट्रीट जर्नलच्या वृत्तानुसार, फ्लाय दुबईमध्ये नियुक्ती होण्यापूर्वी ओमानी अधिकाऱ्यांनी त्याला विमान उडवण्यास मनाई केली होती. मात्र, ओमानने अल-हम्मामीबाबतची चिंता इतर देशांना किंवा विमान कंपन्यांना कळवली होती की नाही, हे अद्याप स्पष्ट झालेलं नाही. एबीसी न्यूजने दिलेल्या वृत्तानुसार, सुरक्षेचा धोका म्हणून चिन्हांकित केल्यानंतर ओमान एअरने या सहवैमानिकाला यापूर्वी उड्डाण करण्यापासून निलंबित केलं होतं.

दरम्यान, हमाम अल-हम्मामी इस्रायलमध्ये विमान कोसळवणार होता, अशी माहिती तपासातून समोर आल्याचा दावा i24NEWS Englishने केला आहे. ३० सप्टेंबर रोजी फ्लाय दुबईच्या फ्लाइट १०७३ मध्ये घडलेल्या घटनेचा तपास सुरू असतानाच ही नवी माहिती समोर आली आहे. हे विमान दुबईहून तेल अवीवकडे जात होते. विमानात १७० हून अधिक प्रवासी आणि कर्मचारी होते.

कॅप्टनवर चाकूने हल्ला

इस्रायली आणि सौदी अधिकाऱ्यांच्या माहितीनुसार, उड्डाणादरम्यान सहवैमानिकाने कॅप्टनवर हल्ला करून त्यांना जखमी केलं. त्यामुळे कॉकपिटमध्ये मोठी आपत्कालीन परिस्थिती निर्माण झाली. रॉयटर्सने तपासलेल्या फ्लाइट-ट्रॅकिंग डेटानुसार, सौदी अरेबियाच्या हवाई हद्दीत असताना विमानाने अचानक तीव्र वळण घेतलं आणि दोन वेळा मोठी घसरण केली. सर्वाधिक तीव्र घसरणीदरम्यान अवघ्या ३० सेकंदांपेक्षा थोड्या अधिक कालावधीत विमानाची उंची १६ हजार फुटांहून अधिक कमी झाली. त्यानंतर विमान स्थिर करण्यात आलं. विमानाने नंतर आपत्कालीन संदेश पाठवले आणि तेल अवीवला जाण्याऐवजी सौदी अरेबियातील वायव्य भागातील तबूक येथे आपत्कालीन लँडिंग केले. इस्रायली अधिकाऱ्यांनी सहवैमानिक विमान पाडण्याचा प्रयत्न करत असल्याचे म्हटलं आहे. मात्र, तपासकर्त्यांनी त्याच्या हेतूबाबत अद्याप अंतिम निष्कर्ष जाहीर केलेला नाही.

सहवैमानिकाच्या हेतूबाबत अद्याप प्रश्नचिन्ह

इस्रायलचे पंतप्रधान बिन्यामिन नेतन्याहू यांनी सहवैमानिकावर ‘इस्लामवादी कट्टरतावादी विचारांचे प्रशिक्षण’ घेतल्याचा आरोप केला. तसंच तो आत्मघातकी मानसिकतेचा दिसत असल्याचंही त्यांनी म्हटलं. मात्र, या दाव्यांच्या समर्थनार्थ त्यांनी कोणतेही पुरावे दिले नाहीत. शुक्रवारी प्रसिद्ध केलेल्या व्हिडिओ संदेशात नेतन्याहू म्हणाले की, हा सहवैमानिक कोणाच्या सांगण्यावरून काम करत होता का, याचा तपास सुरू आहे. तसं असल्यास, त्यामागे असलेल्या व्यक्तींवर कठोर कारवाई केली जाईल, असं त्यांनी म्हटलं. इस्रायली सुरक्षा अधिकाऱ्यांच्या मते, सहवैमानिकाने बहुधा हे कृत्य एकट्याने केले असावे. मात्र, तपास अद्याप सुरू असल्याचे त्यांनी स्पष्ट केलं आहे. संयुक्त अरब अमिरातीतील इस्रायलचे राजदूत यांनी अद्याप या घटनेमागील हेतू निश्चित झालेला नसल्याचं म्हटलं आहे. ओमानी अधिकाऱ्यांनी किंवा सहवैमानिकाच्या प्रतिनिधींनी या आरोपांवर अद्याप सार्वजनिक प्रतिक्रिया दिलेली नाही.