तेल अवीवला जाणाऱ्या ‘फ्लायदुबई’ विमानाचे कॉकपिटमध्ये झालेल्या प्राणघातक हल्ल्यात गंभीर जखमी झालेले भारतीय वैमानिक कॅप्टन स्मीत मच्छार यांच्यावर सध्या वैद्यकीय उपचार सुरू आहेत. या भीषण घटनेची माहिती पहिल्यांदा मिळाली तेव्हा आपली मानसिक स्थिती पूर्णपणे ढासळली होती आणि काय प्रतिक्रिया द्यावी हेच समजत नव्हते, अशी प्रतिक्रिया स्मित यांच्या पत्नी सोनल मच्छार यांनी दिली आहे. ‘सीएनएन-न्यूज१८’ला दिलेल्या विशेष मुलाखतीत त्या बोलत होत्या.
विमानावर झालेल्या या अचानक हल्ल्याची माहिती मिळाल्यानंतरचा तो क्षण अत्यंत हादरवून टाकणारा होता, असे सांगताना सोनल म्हणाल्या, “कॉकपिटमध्ये स्मित यांच्यावर हल्ला झाल्याची बातमी जेव्हा माझ्यापर्यंत पोहोचली, तेव्हा मी पूर्णपणे खचून गेले होते. बातमीने माझ्या पायाखालची जमीन सरकली; त्या क्षणी काय घडले आहे हे समजून घेण्याची किंवा त्यावर कोणतीही प्रतिक्रिया देण्याची माझी मानसिक ताकद उरली नव्हती.”
कुटुंब आणि प्रशासनाच्या पाठिंब्यामुळे धीर मिळाला
काळजीच्या त्या अत्यंत कठीण प्रसंगात नातेवाईक, मित्रपरिवार आणि भारतीय अधिकाऱ्यांकडून मिळालेल्या सातत्यपूर्ण माहितीमुळे मोठा आधार मिळाल्याचे त्यांनी नमूद केले. “माझे कुटुंब आणि मित्रपरिवार या कठीण काळात पाठीशी खंबीरपणे उभा राहिला. स्मित यांची प्रकृती स्थिर असल्याचे समजल्यानंतर मला मोठा धीर मिळाला. गुरुवारी मी स्वतः त्यांची भेट घेतली. सध्या युएईमधील लष्करी डॉक्टर आणि तज्ज्ञ वैद्यकीय पथक त्यांच्यावर उत्तम उपचार करत असून, ते सुरक्षित हातात असल्याची मला खात्री पटली आहे,” असे सोनल यांनी सांगितले.
सध्या आपले संपूर्ण लक्ष स्मित यांच्या लवकरात लवकर होणाऱ्या प्रवासावर आणि पूर्ण बरे होण्यावर केंद्रित असल्याचे त्यांनी स्पष्ट केले. “स्मित यांनी लवकरात लवकर पूर्णपणे बरे होऊन घरी परतावे, एवढीच माझी इच्छा आहे. त्यांच्या पुनर्वसनासाठी आणि आरोग्यासाठी जे जे आवश्यक आहे, ते सर्व मी करेन,” असा विश्वास त्यांनी व्यक्त केला.
नेतान्याहू यांच्याशी संभाषणावर काय म्हणाल्या?
इस्त्रायलचे पंतप्रधान बेंजामिन नेतान्याहू यांनी कॅप्टन स्मित मच्छार यांच्याशी संवाद साधण्याची इच्छा व्यक्त केल्याच्या वृत्तावर बोलताना सोनल म्हणाल्या, “मी पंतप्रधान नेतान्याहू यांच्याशी बोलू शकणार नाही. यासाठी स्मीत हेच योग्य व्यक्ती आहेत आणि तेच त्यांच्याशी संवाद साधतील. स्मीत यांची प्रकृती पूर्णपणे सुधारल्यानंतर आणि मानसिकदृष्ट्या ते संवादासाठी तयार झाल्यानंतर नेतान्याहू यांच्याशी नक्कीच बोलतील.”
नेमकी काय घडली होती घटना?
तेल अवीवच्या दिशेने जाणाऱ्या फ्लायदुबईच्या विमानात एका माथेफिरूने कॉकपिटमध्ये घुसून अचानक हल्ला चढवला होता. या झटापटीत कॅप्टन स्मीत मच्छार गंभीर जखमी झाले. कॉकपिटमधील इतर वैमानिक आणि विमानातील कर्मचाऱ्यांनी अत्यंत धाडसाने हल्लेखोराला रोखून परिस्थिती नियंत्रणात आणली. या आणीबाणीच्या प्रसंगात विमानाचे सौदी अरेबियामध्ये आपत्कालीन लँडिंग करण्यात आले. भारतीय वैमानिकाच्या या धाडसाचे आणि सहकाऱ्यांच्या सतर्कतेचे सर्वत्र कौतुक होत असून, संपूर्ण देश स्मीत मच्छार यांच्या लवकरात लवकर बरे होण्यासाठी प्रार्थना करत आहे.
