मालदीवचे माजी उपराष्ट्रपती अहमद अदीब अब्दुल गफूर यांना भारतात बेकायदेशीर पद्धतीने प्रवेश करण्याचा प्रयत्न करताना ताब्यात घेण्यात आले असल्याची माहिती समोर आली आहे. ही घटना तामिळनाडूतील तूतीकोरिन येथे घडली. अहमद अदीब यांना तूतीकोरिन बंदरावर त्यावेळी ताब्यात घेण्यात आले, जेव्हा ते भारतात बेकायदेशीरिरत्या प्रवेश करण्याचा प्रयत्न करत होते, असे भारतीय तपास संस्थांच्या अधिकाऱ्यांनी सांगितले आहे.

अदीब यांना आयबीच्या अधिकाऱ्यांनी ताब्यात घेतल्यानंतर परराष्ट्र मंत्रालयास याबाबत माहिती दिल्या गेली. यानंतर परराष्ट्र मंत्रालयाचे प्रवक्ता रवीश कुमार यांनी म्हटले की, आम्ही या घटनेची सत्यता पडताळून पाहण्याचा प्रयत्न करत आहोत. आम्ही त्यांच्या सरकारशी संपर्क साधू व जाणून घेऊ की ही बातमी खरी आहे की नाही.

अदीब हे “विर्गो 9” या बोटीद्वारे भारतीय किनाऱ्यावर पोहचे होते. यामध्ये जवळपास १० जण होते. सध्या त्यांना कुठे ठेवण्यात आले आहे याबाबत माहिती देण्यात आलेली नाही.