जागतिक राजकारण, युक्रेन युद्ध, इराणचा प्रश्न आणि आंतरराष्ट्रीय व्यापार यांसारख्या महत्त्वाच्या विषयांवर चर्चा करण्यासाठी जी-७ (G7) परिषद पार पडली. या परिषदेत जगातील प्रमुख अर्थव्यवस्थांच्या देशांचे नेते सहभागी झाले होते. अधिकृत बैठकींमध्ये हे नेते अत्यंत गंभीर दिसत असले, तरी पडद्यामागे त्यांच्या गप्पा, विनोद आणि अनौपचारिक चर्चा कशा रंगतात, याची झलक काही ‘हॉट माइक’ क्षणांमधून समोर आली.
परिषदेदरम्यान काही मायक्रोफोन चुकून सुरू राहिल्याने जागतिक नेत्यांमधील खाजगी संवाद रेकॉर्ड झाले. यामध्ये इटलीच्या पंतप्रधान जॉर्जिया मेलोनी यांचे धूम्रपान सोडल्याबद्दलचे वक्तव्य, फ्रान्सचे राष्ट्राध्यक्ष इमॅन्युएल मॅक्रॉन यांचे विसरलेले घड्याळ आणि डोनाल्ड ट्रम्प यांचे ‘ग्रीनलँड’ संदर्भातील विधान यांचा समावेश आहे.
‘१ मेपासून सिगारेटला हात लावलेला नाही’ – जॉर्जिया मेलोनी
बैठकीपूर्वीच्या अनौपचारिक संभाषणात जर्मनीचे चान्सलर फ्रिड्रिख मर्झ यांनी मेलोनी यांना विचारले, “आज सकाळी सिगारेट ओढली का?” यावर मेलोनी हसत म्हणाल्या, “मी १ मेपासून सिगारेटला स्पर्शही केलेला नाही.” त्यांचे हे उत्तर ऐकताच उपस्थित नेत्यांनी टाळ्या वाजवून त्यांचे अभिनंदन केले. कॅनडाचे पंतप्रधान मार्क कार्नी यांनी विनोदाने, “निकोटीन पॅच वापरताय का?” असा प्रश्न विचारला. यावर उपस्थितांमध्ये हशा पिकला.
जेवणाच्या टेबलावर फुटबॉलच्या गप्पा
दुपारच्या भोजनादरम्यान नेत्यांमध्ये फुटबॉलवरूनही चर्चा रंगली. फ्रेंच संघाला प्रोत्साहन देण्यासाठी काहींनी “Allez les Bleus!” (चला फ्रान्स!) अशी घोषणा दिली. तसेच पॅरिस सेंट-जर्मन (PSG) क्लबच्या यशाबद्दलही चर्चा झाली. ब्रिटनचे पंतप्रधान कीर स्टारमर यांनी केप व्हर्डे संघाच्या कामगिरीबद्दल आश्चर्य व्यक्त केले.
ट्रम्प यांचे ‘ग्रीनलँड’ विधान चर्चेत
डोनाल्ड ट्रम्प आणि युरोपियन कौन्सिलचे अध्यक्ष अँटोनियो कोस्टा यांच्यातील संभाषणाचाही काही भाग रेकॉर्ड झाला. ट्रम्प यांनी कोस्टा यांच्याकडे पाहत “ग्रीनलँड!” असा उल्लेख केला. त्यानंतरचे संभाषण स्पष्ट ऐकू आले नाही. त्यामुळे त्यांच्या या वक्तव्यामागचा नेमका संदर्भ अद्याप अस्पष्ट आहे.
मॅक्रॉन यांचे विसरलेले घड्याळ
दुपारचे भोजन संपल्यानंतर इमॅन्युएल मॅक्रॉन आपले घड्याळ टेबलावरच विसरून गेले. मार्क कार्नी यांनी ते पाहून विनोदाने, “मॅक्रॉन यांचे घड्याळ आता आमच्या ताब्यात आहे,” असे म्हटले. यावर ट्रम्प यांनी मिश्कीलपणे, “ते मला देऊन टाका,” अशी प्रतिक्रिया दिली. त्यांच्या या वक्तव्यावर उपस्थितांमध्ये हशा पिकला.
मॅक्रॉन यांच्याकडून सायकल भेट
पुढील वर्षी होणाऱ्या सायकलिंग वर्ल्ड चॅम्पियनशिपच्या निमित्ताने मॅक्रॉन यांनी सहभागी नेत्यांना विशेष सायकली भेट दिल्या. युनियन सायकलिस्ट इंटरनॅशनलचे अध्यक्ष डेव्हिड लॅपेर्टियंट यांनी सोशल मीडियावर याची माहिती दिली.
तसेच जर्मनीचे चान्सलर फ्रिड्रिख मर्झ यांनी ट्रम्प यांना ‘४७’ क्रमांकाची जर्मनीची फुटबॉल जर्सी भेट दिली. ट्रम्प हे अमेरिकेचे ४७ वे राष्ट्राध्यक्ष असल्यामुळे हा क्रमांक निवडण्यात आला.
‘मेलोडी’ पुन्हा चर्चेत
ग्रुप फोटोपूर्वी भारताचे पंतप्रधान नरेंद्र मोदी आणि जॉर्जिया मेलोनी यांची भेट झाली. सोशल मीडियावर ‘मेलोडी’ म्हणून प्रसिद्ध असलेल्या या जोडीने एकमेकांचे उत्साहाने स्वागत केले. मेलोनी म्हणाल्या, “तुम्हाला पुन्हा भेटून आनंद झाला.” त्यावर मोदी यांनी सोशल मीडियावरील त्यांच्या लोकप्रियतेचा उल्लेख केला. मेलोनी हसत म्हणाल्या, “हो, इन्स्टाग्रामवर आपण खूपच लोकप्रिय आहोत.”
मॅक्रॉन यांचे झेलेन्स्की यांना आश्वासन
फ्रान्सचे राष्ट्राध्यक्ष इमॅन्युएल मॅक्रॉन आणि युक्रेनचे अध्यक्ष व्होलोडिमिर झेलेन्स्की यांच्यातील संभाषणात ट्रम्प यांच्याशी संभाव्य भेटीचा विषय चर्चिला गेला. झेलेन्स्की यांची ट्रम्प यांच्याशी भेट घडवून आणण्यासाठी प्रयत्न करू, असे मॅक्रॉन यांनी सांगितल्याचे संभाषणातून समोर आले.
चीनच्या इलेक्ट्रिक वाहनांबाबत चर्चा
कॅनडाचे पंतप्रधान मार्क कार्नी यांनी चीनमधून आयात होणाऱ्या इलेक्ट्रिक वाहनांबाबत ट्रम्प यांच्याशी चर्चा केली. कॅनडाने अशा वाहनांवर कडक निर्बंध घातल्याचे सांगताना कार्नी यांनी बाजारपेठेतील त्यांचा वाटा अत्यल्प असल्याचे स्पष्ट केले. यावर ट्रम्प यांनी समाधान व्यक्त केले.
जी-७ बद्दल थोडक्यात….
जी-७ गटामध्ये अमेरिका, कॅनडा, फ्रान्स, जर्मनी, इटली, जपान, ब्रिटन आणि युरोपियन युनियनचा समावेश होतो. या देशांचे नेते जागतिक अर्थव्यवस्था, सुरक्षा आणि परराष्ट्र धोरणाशी संबंधित महत्त्वाच्या मुद्द्यांवर चर्चा करण्यासाठी नियमितपणे एकत्र येतात.
