आयुष्यात कधी काय घडेल याचा नेम नसतो, याचा प्रत्यय कर्नाटकच्या उडुपीमध्ये एका थरारक घटनेतून आला आहे. विहिरीच्या कामासाठी उतरलेला ६२ वर्षीय वृद्ध अचानक पाय घसरून विहिरीत पडला आणि तब्बल तीन दिवस मृत्यूशी झुंज देत राहिला. अखेर, एका गॅस सिलिंडरच्या डिलिव्हरीने आणि त्यासाठी लागणाऱ्या एका ‘OTP’ ने या वृद्धाचे प्राण वाचवले आहेत. आजच्या डिजिटल युगात आपण अनेकदा OTP किंवा तांत्रिक नियमांना कंटाळतो, पण याच एका नियमामुळे श्रीनिवास आचार्य या व्यक्तीचा जीव वाचला.
नेमकी घटना काय?
कोडावूर प्रभागातील कोबलुकट्टू येथील रहिवासी असलेले श्रीनिवास आचार्य (६२) हे आपल्या घराशेजारील विहिरीची साफसफाई आणि देखभालीचे काम करत होते. श्रीनिवास हे घरी एकटेच राहत असल्याने, मदतीसाठी त्यांच्याकडे दुसरे कोणीही नव्हते. विहिरीत उतरलेले असताना अचानक ज्या दोरीचा आणि पाईपचा त्यांनी आधार घेतला होता, तो निखळला.
तोल गेल्यामुळे आचार्य थेट विहिरीच्या खोल पाण्यात कोसळले. सुदैवाने, पडल्यानंतर त्यांनी विहिरीतील एका पाईपला घट्ट पकडून ठेवले. मात्र, विहीर खोल असल्याने आणि आसपास वस्ती विरळ असल्याने त्यांना वर येणे अशक्य झाले.
तीन दिवसांचा थरार आणि एकाकी लढा
विहिरीत अडकलेल्या श्रीनिवास यांनी मदतीसाठी ओरडून आवाज देण्याचा प्रयत्न केला, मात्र त्यांचा आवाज कोणापर्यंतही पोहोचू शकला नाही. अन्न आणि पाण्याविना ते तीन दिवस विहिरीच्या भिंतीला धरून उभे होते. दिवसभर कडाक्याचे ऊन आणि रात्रीचा गारवा अशा परिस्थितीत ६२ वर्षांच्या या वृद्धाची शारीरिक आणि मानसिक शक्ती खालावत होती. जगण्याची आशा कमी होत असतानाच एक अनपेक्षित चमत्कार घडला.
डिलिव्हरी बॉयची सतर्कता
या घटनेचा निर्णायक वळण तेव्हा आले, जेव्हा गॅस डिलिव्हरी एजंट गणेश हा श्रीनिवास आचार्य यांच्या घरी सिलिंडर देण्यासाठी पोहोचला. नियमानुसार, गॅसची डिलिव्हरी पूर्ण करण्यासाठी ग्राहकाच्या मोबाईलवर आलेला ‘OTP’ (One Time Password) सांगणे अनिवार्य असते. गणेशने वारंवार श्रीनिवास यांना हाक मारली, पण आतून काहीच प्रतिसाद मिळाला नाही. त्यांच्या मोबाईलवर फोन केला असता तो घरातच वाजत होता.
सामान्यतः अशा वेळी डिलिव्हरी बॉय सिलिंडर परत घेऊन जातात, पण गणेशला काहीतरी अघटित घडल्याची शंका आली. त्याने आजूबाजूच्या लोकांशी संपर्क साधला आणि परिसरात शोध घेण्यास सुरुवात केली. शोध घेत असतानाच विहिरीतून कोणीतरी ओरडत असल्याचे त्यांच्या लक्षात आले.
अग्निशमन दलाची धाव आणि सुखरूप सुटका
विहिरीत डोकावून पाहिले असता श्रीनिवास आचार्य हे पाईपला धरून मदतीची वाट पाहत असल्याचे दिसले. स्थानिकांनी तातडीने अग्निशमन दलाला पाचारण केले. घटनेचे गांभीर्य ओळखून बचाव पथकाने घटनास्थळी धाव घेतली आणि दोरीच्या सहाय्याने श्रीनिवास यांना सुखरूप बाहेर काढले. तीन दिवस अन्न-पाण्याविना राहिल्याने त्यांची प्रकृती चिंताजनक होती. त्यांना तातडीने रुग्णालयात दाखल करण्यात आले.
