St Francis Xavier controversy Goa: संत फ्रान्सिस झेवियर वाद; युट्युबर गौतम खट्टरविरुद्ध गोव्यातील नागरिक रस्त्यावर का उतरलेत?

नागरिक उतरले रस्त्यावर

गौतम खट्टर स्वत: अध्यात्मिक विषयातील पत्रकार असल्याचे सांगतो तसेच त्याने सनातन महासंघाची स्थापना केली आहे. वास्को येथे भगवान परशुराम जन्मोत्सव कार्यक्रम आयोजित केला होता. या कार्यक्रमात खट्टरने केलेल्या भाषणात संत फ्रान्सिस झेवियर यांच्याविरोधात आक्षेपार्ह वक्तव्य केले. खट्टरचे वक्तव्य सोशल मीडियावर जोरदार व्हायरल झाले. यामुळे गोव्यातील नागरिक आणि राजकीय नेत्यांनी खट्टरच्याविरुद्ध जोरदार टीका केली. संतप्त नागरिकांनी रस्त्यावर उतरुन खट्टरच्या अटकेची मागणी केली.

आयोजकांकडून माफी

या कार्यक्रमाचे आयोजन करणाऱ्या सनातन धर्म रक्षा समितीने खट्टर यांच्या वक्तव्यापासून स्वत:ला लांब ठेवले. तसेच, खट्टरच्या वक्तव्याबाबत समितीने दिलगिरी व्यक्त केली. “खट्टरला सनातन धर्माबाबत बोलण्यासाठी बोलवले होते पण, ते आक्षेपार्ह विधान करतील याबाबत कल्पना नव्हती. खट्टरने केलेले वक्तव्य त्याचे स्वत:चे मत आहे, यात अयोजकांचा संबंध नाही. याप्रकरणी आम्ही गोव्यातील नागरिकांनी मनापासून माफी मागतो”, असे सनातन धर्म रक्षा समितीने स्पष्ट केले.

आर्चडायोसीसकडून नाराजी व्यक्त

गोवा आणि दमणच्या आर्चडायोसीसने या प्रकाराबद्दल तीव्र दुःख आणि वेदना व्यक्त केल्या आहेत. “द्वेषाने भरलेली अशा प्रकारची वक्तृत्वशैलीमुळे लाखो गोवेकरांच्या भावनांना खोलवर दुखावल्या आहेत. आम्ही सर्वांना शांत राहण्याचे आणि संयम बाळगण्याचे आवाहन करतो”, असे आर्चडायोसीसने म्हटले आहे. याशिवाय सत्ताधारी भाजप, काँग्रेस, आप आणि गोवा फॉरवर्ड पार्टीसह सर्वपक्षीय नेत्यांनीही या वक्तव्याचा निषेध केला आहे. तर, मुख्यमंत्री प्रमोद सावंत यांनी याप्रकरणी कठोर कारवाईचे आश्वासन दिले आहे.

कोण आहे संत फ्रान्सिस झेवियर?

संत फ्रान्सिस झेवियर यांना ‘गोंयचो सायब’ म्हणूनही ओळखले जाते. झेवियर ‘द सोसायटी ऑफ जीझस’च्या संस्थापक सदस्यांपैकी एक होते. झेवियर यांचे अवशेष १६२४ पासून ओल्ड गोव्यातील बॉम जीझसच्या बॅसिलिकामध्ये ठेवलेले आहेत. पोर्तुगीजांच्या वसाहत काळात १५४२ मध्ये ते गोव्यात आले होते. १५५२ मध्ये चीनच्या किनाऱ्याजवळील शांगचुआन बेटावर त्यांचे निधन झाले आणि त्यांना सुरुवातीला त्याच बेटावर दफन करण्यात आले. १५५३ मध्ये, त्यांचे अवशेष थडग्यातून बाहेर काढून सध्याच्या मलेशियातील मलाक्का येथे नेण्यात आले, तिथं अनेक महिने सेंट पॉल चर्चमध्ये ते ठेवण्यात आले. त्यानंतर १५५४ मध्ये त्या संतांचे शरीर जहाजाने गोव्याला आणण्यात आले. १६१३ पर्यंत हे शरीर बॅसिलिकाजवळील कासा प्रोफेसा येथे हलवण्यात आले आणि १६२४ मध्ये ओल्ड गोव्यातील बॅसिलिकामध्ये ठेवण्यात आले.

यापूर्वीही वाद

दरम्यान, यापूर्वी देखील संत झेवियर यांच्यावरुन गोव्यात वाद झाला आहे. ऑक्टोबर २०२४ मध्ये, गोवा राष्ट्रीय स्वयंसेवक संघाचे (आरएसएस) माजी प्रमुख सुभाष वेलिंगकर यांनी झेवियर यांच्या अवशेषांचे डीएनए चाचणी करण्याची मागणी केली. यानंतर देखील गोव्यात मोठ्या प्रमाणावर नागरिक रस्त्यावर उतरले होते. धार्मिक भावना दुखावल्याबद्दल आणि जातीय सलोखा बिघडवल्याबद्दल त्यांच्यावर एफआयआर दाखल करण्यात आला होता.