St Francis Xavier Gautam Khattar Remark Controversy: गोव्यातील सेंट फ्रान्सिस झेवियर यांच्याबद्दल आक्षेपार्ह वक्तव्य, युट्युबर गौतम खट्टरच्या विरोधात गुन्हा; भाजपाचे आमदार, मंत्रीही गोत्यात

भाजपा मंत्री, नेत्यांची कार्यक्रमाला उपस्थिती

दक्षिण गोव्यातील वास्कोत भगवान पशुराम जन्मोत्सवाच्या निमित्ताने कार्यक्रमाचे आयोजन करण्यात आले होते. सनातन महासंघाचे संस्थापक आणि युट्युबर गौतम खट्टरने या कार्यक्रमाला हजेरी लावली होती. या कार्यक्रमात खट्टरने सेंट फ्रान्सिस झेवियर यांच्याविरुद्ध वादग्रस्त वक्तव्य केले. सनातन धर्म रक्षा समिती, मुरगावच्या वतीने आयोजित या कार्यक्रमाला गोव्याचे वाहतूक मंत्री मॉविन गुदिन्हो आणि भाजपा आमदार संकल्प आमोणकर तसेच कृष्णा साळकर यांनी हजेरी लावली होती.

खट्टरविरोधात गुन्हा नोंद

कुठ्ठाळीचे काँग्रेसचे नेते पीटर डिसोझा यांनी याप्रकरणी खट्टरच्या विरोधात वास्को पोलिस ठाण्यात तक्रार दाखल केली. ख्रिस्ती लोकांच्या धार्मिक भावना दुखवणे आणि सामाजिक सलोख बिघडवल्याचा आरोप खट्टरच्या विरोधात करण्यात आला आहे. तक्रारीची दखल वास्को पोलिसांनी खट्टरच्या विरोधात गुन्हा नोंद केला आहे. पोलिस या घटनेचा तपास करत आहेत.

आयोजकांकडून माफी

सनातन धर्म रक्षा समितीने या वक्तव्यापासून स्वत:ला दूर करत ख्रिस्ती समुदायाची माफी मागितली आहे. ‘खट्टरच्या वक्तव्याचा दुर्दैवी असा उल्लेख करत त्या वक्तव्याचा निषेध करतो’, असे समितीने स्पष्ट केले. ‘खट्टर असे वक्तव्य करेल याची कल्पना नव्हती पण ते असे वक्तव्य केल्यानंतर तात्काळ थांबविण्यात आले’, असे समितीने पत्रकारांना सांगितले. खट्टरच्या वक्तव्यामुळे राज्यातील विरोधी पक्षातील नेत्यांनी जोरदार टीका केली.

खट्टरवर कारवाईची मागणी

काँग्रेसने खट्टरच्या विरोधात सक्त कारवाईची मागणी केली. काँग्रेस प्रदेशाध्यक्ष अमित पाटकर यांनी कार्यक्रमाचे आयोजक आणि यावेळी व्यासपीठावर उपस्थित असणाऱ्या नेत्यांना देखील जबाबदार धरण्याची मागणी केली. आम आदमी पक्षाने देखील या वक्तव्याचा निषेध केला. गोवा फॉरवर्ड पक्षाचे प्रमुख विजय सरदेसाई यांनी खट्टरचे वक्तव्य झेवियर यांच्या भक्तांचा अपमान करणारे असल्याचे मत नोंदवले. दरम्यान, सेंट झेवियर यांना गोंयचो सायब म्हणून ओळखले जाते. १६२४ पासून त्यांचे अवशेष ओल्ड गोव्यातील बॅसिलिका ऑफ बॉम जिझस चर्चमध्ये ठेवण्यात आले आहेत.