गुरुग्राममध्ये मध्यरात्री थरार! ६० हून अधिक गोळ्या झाडल्या; १० कोटींच्या खंडणीसाठी आलेल्या ४ शार्पशूटर्सचा एन्काऊंटर

उद्योगपतीच्या घरावर गोळीबार

रात्री सुमारे ९.५० वाजता आरोपी स्कॉर्पिओमधून उद्योगपतीच्या घराबाहेर पोहोचले. वाहनाचा नंबर कॅमेऱ्यांपासून लपवण्यासाठी नंबर प्लेटवर काळी टेप लावण्यात आली होती. आरोपींनी घराच्या आवारातील गाड्या तसेच पहिल्या मजल्यावरील बाल्कनी आणि खिडक्यांवर गोळीबार केला. त्यावेळी उद्योगपतींचे कुटुंबीय घरात उपस्थित होते. सुदैवाने या हल्ल्यात कोणालाही दुखापत झाली नाही.

पोलिसांनी आधीच लावला होता सापळा

खंडणीच्या धमक्यांबाबत गुप्त माहिती मिळाल्यानंतर गुन्हे शाखेच्या पथकांना काही दिवसांपासून परिसरात तैनात करण्यात आले होते. स्कॉर्पिओ येताच पोलिसांनी आरोपींना शरण येण्याचे आवाहन केले. मात्र, त्यांनी पोलिसांवरच गोळीबार सुरू केला. त्यानंतर सुमारे दोन मिनिटे जोरदार चकमक उडाली.

६० हून अधिक गोळ्यांचा वर्षाव

पोलिसांच्या माहितीनुसार आरोपींनी स्वयंचलित PX 30 पिस्तुलांमधून ४० गोळ्या झाडल्या, तर दोन्ही बाजूंनी मिळून ६० हून अधिक राऊंड फायर झाले. परिसरात नागरिक असल्याने पोलिसांना प्रत्युत्तर देणे भाग पडले.

४ ठार, एक गंभीर; १७ वर्षीय अल्पवयीनाचाही समावेश

चकमकीत दीपा उर्फ संदीप (३५), नितीन (२२), अंकित (१८) आणि १७ वर्षीय अल्पवयीन मुलगा ठार झाले आहेत. अल्पवयीन आरोपी शाळेच्या भालाफेक संघाचा खेळाडू असल्याची माहिती पोलिसांनी दिली. शिवम नावाचा आणखी एक आरोपी गंभीर जखमी असून त्याच्यावर रुग्णालयात उपचार सुरू आहेत.

तीन पोलीस जखमी

या कारवाईदरम्यान शिपाई मनजीत सिंह, शमशेर सिंह आणि सहाय्यक उपनिरीक्षक सुनील कुमार यांना गोळ्या लागल्या. त्यांच्यावर रुग्णालयात उपचार सुरू असून त्यांची प्रकृती स्थिर असल्याचे पोलिसांनी सांगितले.

हत्येच्या उद्देशाने हल्ला

डीसीपी (गुन्हे) हितेश यादव यांनी टाइम्स ऑफ इंडियाला सांगितले की, आरोपी उद्योगपतीची हत्या करण्याच्या उद्देशानेच आले होते. गँगस्टर दीपक नंदाल मोठ्या प्रमाणात खंडणी उकळत असून त्याच्याविरोधात खून, खंडणी आणि गोळीबाराचे अनेक गुन्हे दाखल आहेत. उद्योगपतीला यापूर्वीही त्याने अनेक धमक्या दिल्या होत्या.

शस्त्रे आणि काडतुसे जप्त

घटनास्थळावरून पोलिसांनी पाच पिस्तुले, ५० हून अधिक रिकामी काडतुसे, जिवंत काडतुसे आणि गोळ्या लागलेली स्कॉर्पिओ जप्त केली आहे. फॉरेन्सिक आणि बॅलिस्टिक टीमने घटनास्थळाची तपासणी केली असून पुढील तपास सुरू आहे.

गुन्हा दाखल

या प्रकरणी डीएलएफ सेक्टर-२९ पोलीस ठाण्यात शस्त्रास्त्र कायदा, खुनाचा प्रयत्न आणि बीएनएस (BNS) अंतर्गत खुनाचा प्रयत्न व संघटित गुन्हेगारीचे गुन्हे दाखल करण्यात आले. गँगस्टर दीपक नंदालचा शोध सुरू असून त्याच्या नेटवर्कचाही तपास केला जात आहे.