Honeymoon Murder 2.0 : पत्नीने प्रियकरासह मिळून पतीची केली हत्या आणि अपघाती मृत्यू झाल्याचं भासवलं, ‘बेवफा अंजू’ची सोशल मीडियावर चर्चा

नेमकी घटना काय घडली?

३० जानेवारीला रात्री ९ च्या सुमारास रावला पोलीस ठाण्याच्या हद्दीत अनुपगढ मार्गावर आशिष आणि अंजू हे दोघंही जण बेशुद्ध अवस्थेत पडले होते. या दोघांना रुग्णालयात नेण्यात आलं, ज्यानंतर डॉक्टरांनी आशिषला मृत घोषित केलं. पत्नी अंजूने पोलिसांना एक कबुली जबाब दिला. त्यात तिने पोलिसांना सांगितलं की अज्ञात वाहनाने आम्हाला दोघांना टक्कर दिली आणि सोन्याचे दागिने लुटून ते लोक फरार झाले. पोलिसांनी सांगितलं की सुरुवातीपासूनच आम्हाला हा साधासुधा अपघात नाही काहीतरी वेगळा प्रकार घडला आहे असा संशय आम्हाला होता. आम्ही घटनास्थळाला भेट दिली तिथेही आम्हाला हे लक्षात आलं की हा नुसता अपघात नाही. त्यानंतर मेडिकल चाचणी आणि फोन रेकॉर्डने समोर आलं प्रकरण

फोन रेकॉर्ड आणि मेडिकल रिपोर्टवरुन काय समोर आलं?

आशिषच्या मृतदेहाबाबत जो वैद्यकीय अहवाल आला त्यात हे समोर आलं की आशिषचा मृत्यू अपघातामुळे नव्हता. तर त्याच्या शरीरावर बेदम मारल्याचे व्रण होते. तसंच त्याचा गळा दाबण्यात आला होता. ज्यामुळे अंजूच्या पतीचा म्हणजेच आशिषचा मृत्यू झाला. अपघाती मृत्यूमध्ये आशिषचा मृत्यू झाला हे भासवण्यात आलं. पण अंजूला साधं खरचटलंही नव्हतं त्यामुळे पोलिसांना जो संशय आला तो खरा ठरला कारण हा अपघाती मृत्यू नसून कट रचून केलेली हत्या होती. वैदकीय अहवालातून हे सत्य समोर आलं तर अंजूचे फोन रेकॉर्ड तपासण्यात आले ज्यात हे समजलं की ती तिचा लग्नाआधीचा प्रियकर संजूच्या सातत्याने संपर्कात होती. संजू हा सादुलशहरचा रहिवासी आहे. एनडीटीव्हीने हे वृत्त दिलं आहे.

समोर आलेली सगळी क्रोनोलॉजी काय?

पोलीस तपासात हे समोर आलं की अंजू ही २३ वर्षीय मुलगी तिच्या लग्नामुळे खुश नव्हती. तिने संजू या तिच्या प्रियकरासह मिळून तिच्या पतीचा काटा काढला. अंजू काही दिवसांपूर्वी सादुलशहरला गेली होती. तिथे ती संजू आणि त्याचे दोन मित्र रॉकी आणि बादल यांना भेटली. या सगळ्यांनी मिळून आशिषच्या हत्येचा कट रचला. अंजूला माहीत होतं की आशिष जेवल्यानंतर शतपावली करायला जातो. ठरल्याप्रमाणे अंजू त्याला एका सामसूम रस्त्यावर घेऊन गेली. तिथे आधी त्याची हत्या करण्यात आली आणि मग तो अपघात आहे असं भासवण्यात आलं.