युद्ध पुन्हा भडकताच भारताने मांडली महत्त्वाची भूमिका; परराष्ट्र मंत्रालयाकडून युद्धग्रस्त देशांना आवाहन

राजनैतिक वाटाघाटी करा

२८ फेब्रुवारीपासून अमेरिका-इस्रायलविरुद्ध इराण युद्धाला सुरुवात झाली. तेव्हापासून जागतिक बाजारपेठेत मंदीसदृश्य स्थिती निर्माण झाली आहे. या तिन्ही देशातील संघर्षामुळे होर्मुझच्या सामुद्रधुनीवर जल वाहतूक कोंडी करण्यात आली. परिणामी जगभरातील इंधन पुरवठा साखळी विस्कळीत झाली आहे. त्यामुळे या युद्धाचा थेट फटका देशातील सामान्य नागरिकांना बसत आहे. त्यातच, आता पुन्हा एकदा युद्ध सुरू झाल्याने चिंता व्यक्त केली जात आहे. यावरून सुरू असलेल्या वाटाघाटींमधून राजनैतिक तोडगा काढण्याचे आवाहन भारताने केलं आहे.

मानवी हालअपेष्टा अन्…

याबाबत परराष्ट्र मंत्रालयाचे सचिव रणधीर जयस्वाल म्हणाले, “पश्चिम आशियातील पुन्हा सुरू झालेल्या हल्ल्यांबद्दल भारत तीव्र खेद व्यक्त करत आहे. या घडामोडी आंतरराष्ट्रीय समुदायासाठी अत्यंत चिंतेची बाब आहेत. हा संघर्ष आता १०० हून अधिक दिवस चालला असून यामुळे आधीच अफाट मानवी हालअपेष्टा झाल्या आहेत. तसेच जागतिक अर्थव्यवस्था आणि ऊर्जा पुरवठ्यावरही याचा घातक परिणाम झाला आहे.”

पुन्हा शांतता प्रस्थापित करा

“आम्ही सर्व पक्षांना तात्काळ तणाव कमी करण्याचे, नागरिकांना कोणतीही हानी पोहोचणार नाही याची खात्री करण्याचे आणि सुरू असलेल्या वाटाघाटींमधून राजनैतिक तोडगा काढण्याचे आवाहन करतो जेणेकरून या प्रदेशात पुन्हा शांतता आणि स्थैर्य प्रस्थापित होऊ शकेल”, असं आवाहन भारताकडून करण्यात आलं आहे.