पुतिनपाठोपाठ झेलेन्स्की जानेवारीत भारतभेटीवर? राजकीय संतुलन साधण्याचा मोदी सरकारचा प्रयत्न

गतवर्षी स्वीकारलेल्या संतुलित दृष्टिकोनाचेच अनुसरण करीत झेलेन्स्की यांच्या भेटीमुळे रशिया-युक्रेन युद्धाच्या दोन्ही बाजूंशी संवाद साधण्याच्या दिल्लीच्या प्रयत्नांनाही बळकटी मिळेल. जुलै २०२४ मध्ये पंतप्रधान नरेंद्र मोदी यांनी मॉस्कोमध्ये पुतिन यांच्याशी चर्चा केल्यानंतर ऑगस्टमध्ये युक्रेनला भेट दिली होती.

सूत्रांनी दिलेल्या माहितीनुसार, भारत आणि युक्रेनच्या अधिकाऱ्यांमध्ये अनेक आठवड्यांपासून चर्चा सुरू असून पुतिन यांच्या भारतभेटीपूर्वीच नवी दिल्ली झेलेन्स्की यांच्या कार्यालयाशी संपर्कात होते. प्रस्तावित भेटीची वेळ आणि व्याप्ती अनेक घटकांवर अवलंबून आहे. युक्रेनचे अध्यक्ष सन १९९२, २००२ आणि २०१२ मध्ये भारतात आले होते.पुतिन यांच्या भारतभेटीवर संपूर्ण युरोपचे बारकाईने लक्ष होते. अनेक युरोपीय राजदूतांनीही भारताला युद्ध संपविण्यासाठी मॉस्कोवर दबाव आणण्यासाठी आवाहन केले होते. तथापि, संवाद आणि राजनैतिकता हाच मार्ग असल्याचे तसेच भारत तटस्थ नाही तर शांततेसाठी आहे, असे पंतप्रधान नरेंद्र मोदींनीही यापूर्वी म्हटले होते.