भारतीय वंशाच्या कुटुंबातील चार जणांचे मृतदेह अमेरिकेच्या कॅलिफॉर्नियातील एका फळबागेत आढळल्याने खळबळ उडाली आहे. मृतांमध्ये आठ महिन्यांच्या मुलीचादेखील समावेश आहे. हे कुटुंब काही दिवसांपासून बेपत्ता होते, अशी माहिती 'पीटीआय' या वृत्तसंस्थेने दिली आहे. आठ महिन्यांच्या आरोही धेरीसह तिची आई २७ वर्षीय जसलीन कौर आणि वडील जसदीप सिंग यांचे उत्तर कॅलिफोर्नियातील मर्सेड काऊंटीच्या एका ट्रकिंग कंपनीमधून सोमवारी अपहरण करण्यात आले होते. त्यानंतर बाळाचे काका ३९ वर्षीय अमनदीप सिंग यांचेही अपहरण करण्यात आले होते, अशी माहिती मर्सेड काऊंटी पोलिसांनी दिली आहे. अपहरणकर्त्याचा फोटो पोलिसांनी प्रसिद्ध केला आहे.(फोटो सौजन्य- मर्सेड काऊंटी पोलीस) या चौघांचे मृतदेह इंडियाना आणि हुतचींन्सन रस्त्यावरील एका फळबागेत बुधवारी आढळून आल्याची माहिती पोलिसांनी दिली आहे. फळबागेतील एका शेतमजुराला हे मृतदेह आढळून आले होते. या घटनेमुळे येत असलेला राग शब्दात सांगू शकत नाही, अशी प्रतिक्रिया शेरिफ वार्न्के या पोलीस अधिकाऱ्याने दिली आहे. या कुटुंबाचे अपहरण करतानाचा व्हिडीओ पोलिसांनी प्रसिद्ध केला आहे. या व्हिडीओत जसदीप आणि अमनदीप हाताला बांधलेल्या अवस्थेत ट्रकिंग कंपनीतून बाहेर पडताना दिसत आहेत. त्यानंतर काही वेळातच बाळासह जसलीन कौर इमारतीतून अपहरकर्त्यांसोबत बाहेर जाताना दिसत आहेत. या चौघांचे एका ट्रकमधून अपहरण करण्यात आले होते. मर्सेड काऊंटी पोलीस दलातील अधिकारी शेरिफ वार्न्के यांनी पत्रकार परिषदेत घटनेविषयी माहिती दिली. (फोटो सौजन्य- एपी) या कुटुंबाच्या अपहरणानंतर ४८ वर्षीय मन्युअल सॅलगाडो या संशयिताला पोलिसांनी ताब्यात घेतले आहे. या संशयित अपहरकर्त्यांने कोठडीत आत्महत्या करण्याचा प्रयत्न केल्याची माहिती पोलिसांनी दिली आहे. सध्या सॅलगाडोवर रुग्णालयात उपचार सुरू आहेत. दरम्यान, सॅलगाडोच्या कुटुंबियांनी पोलिसांशी संपर्क साधून त्याने गुन्ह्याची कबुली दिल्याची माहिती दिली आहे. जसदीप यांचे आई-वडील डॉ. रणधीर सिंग आणि किरपाल कौर हे पंजाबच्या होशियारपूरच्या तांडा ब्लॉकमधील हरसी पिंड गावचे रहिवासी आहेत.
