Hyderabad Rape Case : अल्पवयीन मुलाकडून धक्कादायक कृत्य, प्रेमाचे आमिष दाखवून तीन मुलींवर लैंगिक अत्याचार, ब्लॅकमेल करत पैसेही मागितले!

प्रेमाचे आमिष दाखवून लैंगिक अत्याचार

आरोपीने प्रेमाच्या बहाण्याने पीडितांना आमिष दाखवून त्यांच्यावर लैंगिक अत्याचार केल्याचा आरोप केला आहे. त्याने गुन्ह्याचे चित्रिकरणही केले. हे चित्रिकरण पीडितांना दाखवून ब्लॅकमेल करण्यात आले. त्याबदल्यात त्यांच्याकडून पैसे मागण्यात येत होते. हे व्हिडिओ सोशल मीडियावर पोस्ट करून आणि नातेवाईकांना दाखवण्याची धमकी देण्यात आली. त्याबदल्यात आरोपीच्या आर्थिक मागण्या पूर्ण करण्याची धमकी दिली गेली, असंही वृत्तात म्हटलं आहे.

पैशांची मागणी सहन झाली नाही

हा प्रकार २०२५ मध्ये अनेकवेळा झाला. परंतु, आरोपीकडून होत असलेला मानसिक छळ सहन न झाल्याने एका पीडितेने तिच्या पालकांना यासंदर्भात सांगितलं, अशी माहिती पोलिसांनी दिली. पालकांना याबाबत माहिती मिळताच कुटुंबाने संबंधित अल्पवयीन मुलाला मारहाण करून त्याच्याकडून मोबाईल हिसकावून घेतला. तसंच पोलिसांतही धाव घेतली. पोलिसांनी त्याला ताब्यात घेतलं आहे.

पीडिता गर्भवती राहिल्यानंतर प्रकरण उजेडात

पीडितेच्या तक्रारीच्या आधारे आम्ही तपास केला असून असं आढळून आलंय की त्याने इतर दोन अल्पवयीन मुलींवरही लैंगिक अत्याचार केले आहेत. तसंच, त्यांनाही ब्लॅकमेल केलंय. तीन पीडितांपैकी एक त्याच्या कॉलेजमधील आहे. तर दोन इतर कॉलेजमधील आहेत, असं नगरकुरनूलचे एसपी संग्राम सिंह पाटील म्हणाले. आरोपीने गर्भवती असलेल्या पीडितेला गर्भपातासाठी स्थानिक रुग्णालयात नेलं होतं, असंही पोलिसांनी सांगितलं.

आम्ही आतापर्यंत आरोपीच्या फोनवरून एका पीडितेवरील हल्ल्याचे व्हिडिओ मिळवले आहेत. आम्ही गर्भपात झालेल्या रुग्णालयाला भेट दिली आणि त्याचे रेकॉर्ड जप्त केले, असं डीएसपी श्रीनिवास यादव म्हणाले.