ललित मोदी १६ वर्षांनंतर भारतात परतणार; IPL संदर्भात केले महत्त्वाचे विधान

‘माझ्यासाठी आयपीएलचे हितच सर्वोच्च’

लवादाच्या या निर्णयानंतर प्रसारमाध्यमांशी बोलताना ललित मोदी म्हणाले, “काल आलेल्या निकालाने मला खूप आनंद झाला आहे. माझ्यासाठी हा अत्यंत महत्त्वाचा दिवस आहे. गेली १६ वर्षे मी कायदेशीर लढा देत होतो. मी माध्यम आणि सर्वांना जे सांगत होतो, तेच अखेर सत्य म्हणून समोर आले आहे. माझ्यासाठी नेहमीच आयपीएलचे हित सर्वोपरी होते. आता ते जुने प्रकरण संपले असून मी आयुष्यात पुढे जाण्यासाठी आणि भारतात परतण्यासाठी उत्सुक आहे.”

भारतात कधी परतणार, याबद्दल बोलताना त्यांनी स्पष्ट केले, “चालू वर्षाच्या शेवटी किंवा पुढच्या वर्षाच्या सुरुवातीला मी भारतात येईन. ऑक्टोबरमध्ये माझ्या नातवंडाचा जन्म होणार आहे. सर्व काही सुरळीत पार पडल्यावर मी नक्कीच मायदेशी परतणार आहे.”

फेमा (FEMA) प्रकरणात मोठा दिलासा कसा मिळाला?

‘साफेमा’ (SAFEMA) अंतर्गत असलेल्या अपिलेट ट्रिब्युनलने (लवाद) २००९ च्या ‘आयपीएल दक्षिण आफ्रिका फेमा’ प्रकरणात अंमलबजावणी संचालनालयाची (ED) कारवाई आणि दंड रद्द केला आहे. या प्रकरणात ललित मोदी यांच्याविरोधात पुरेसे पुरावे नसल्याचे ट्रिब्युनलने नमूद केले. यामुळे त्यांच्यापुढील सर्वात मोठ्या कायदेशीर आव्हानांपैकी एक महत्त्वाचा अडथळा दूर झाला आहे.

आयपीएलची निर्मिती आणि वादग्रस्त कारकीर्द

ललित मोदींचे क्रिकेटमधील योगदान काय?

ललित मोदी हे आयपीएलचे पहिले अध्यक्ष होते. त्यांनी २००८ ते २०१० या तीन वर्षांच्या काळात या स्पर्धेचे आयोजन केले होते. याच काळात त्यांनी ‘चॅम्पियन्स लीग टी-२०’ स्पर्धेचेही अध्यक्षपद भूषविले. २००५ ते २०१० या काळात ते बीसीसीआयचे (BCCI) उपाध्यक्ष होते. तसेच राजस्थान क्रिकेट असोसिएशनचे दोन वेळा अध्यक्ष आणि पंजाब क्रिकेट असोसिएशनचे उपाध्यक्ष म्हणूनही त्यांनी काम केले होते.

दीर्घकाळ चाललेल्या या कायदेशीर लढाईत मिळालेल्या मोठ्या दिलाशामुळे ललित मोदी यांच्या आगामी भारत दौऱ्याकडे क्रीडा आणि राजकीय वर्तुळाचे लक्ष लागले आहे.