जशास तसे उत्तर देऊ! हल्ल्याच्या धमकीनंतर इराणचे अमेरिकेला प्रत्युत्तर

दरम्यान, इराणला अमेरिकेबरोबर लष्करी संघर्ष करण्याऐवजी अणुकरार करावयाचा आहे, असे अमेरिकेचे अध्यक्ष डोनाल्ड ट्रम्प यांनी व्हाइट हाऊसमध्ये पत्रकारांना सांगितले. मात्र, या करारासाठी इराणला कोणतीही मुदत दिली आहे की नाही, याबद्दल त्यांनी काही सांगितले नाही. त्याचवेळी, अमेरिकेने इराणभोवती सैन्याची तैनाती वाढवली आहे.

दुसरीकडे, इराणने कधीही अण्वस्त्रे मिळवण्याचा प्रयत्न केला नाही, असा दावा त्या देशाचे परराष्ट्रमंत्री सय्यद अब्बास अराघाची यांनी शनिवारी केला. अराघाची यांनी तुर्कीचे अध्यक्ष रेसेप तय्यिप एर्दोगान आणि परराष्ट्रमंत्री हकान फिदान यांच्याशी चर्चा केली. इराण आपल्या प्रदेशात शांतता आणि स्थैर्याचे संरक्षण करत आहे, असे अराघाची यांनी या नेत्यांशी चर्चा केल्यानंतर एक्सवर लिहिले.

एर्दोगान आणि फिदान यांच्याशी चर्चेदरम्यान मी याचा पुनरुच्चार केला की, इराण निष्पक्ष आणि न्याय्य अणुकरारासाठी तयार आहे. त्यामध्ये आमच्या जनतेच्या वैध हितांचे संरक्षण झाले पाहिजे. त्यामध्ये अण्वस्त्र नसण्याची हमी असेल, तसेच निर्बंध हटवण्याचीही हमी असेल. – सय्यद अब्बास अराघाची, परराष्ट्रमंत्री, इराण

निदर्शनांमध्ये बाह्य शक्तीचा आरोप

इराणमध्ये झालेल्या निदर्शनांदरम्यान डोनाल्ड ट्रम्प, इस्रायलचे पंतप्रधान बिन्यामिन नेत्यानाहू आणि युरोपीय देशांच्या नेत्यांनी तणावास खतपाणी घातले, असा आरोप इराणचे अध्यक्ष मसूद पेझेश्कियां यांनी शनिवारी केला. या नेत्यांनी इराणमध्ये दुही माजवण्यासाठी आर्थिक संकटाचा फायदा उठवला आणि देशात अशांतता भडकावली असे ते म्हणाले.