नेपाळ आणि तिबेटच्या सीमेवर आलेल्या महापुरात आणि ढगफुटीसदृश नैसर्गिक आपत्तीत मोठी जीवितहानी झाली आहे. कैलास मानसरोवर यात्रेवरून परतणाऱ्या ‘ईशा फाऊंडेशन’च्या ८० भाविकांचा गट या जलप्रलयात वाहून गेल्याची भीषण शंका व्यक्त केली जात आहे. तिबेटमधील ‘सागा’ येथील शिबिरातून या दुर्घटनेची माहिती देताना ईशा फाऊंडेशनचे संस्थापक सद्गुरू जग्गी वासुदेव यांना अश्रू अनावर झाले. बोलताना सद्गुरूंचे हात थरथरत होते. त्यांनी भारतीय आणि जागतिक प्रशासनाला तातडीने मदत करण्याचे आवाहन केले आहे.
इमिग्रेशन सेंटर काही सेकंदात जमिनीदोस्त
इंडिया टूडेच्या वृत्तानुसार, कैलास मानसरोवर यात्रा पूर्ण करून ८० भाविकांचा हा गट तिबेटच्या ‘किरोंग’ भागातील इमिग्रेशन सेंटरमध्ये कागदपत्रांच्या प्रक्रियेसाठी थांबला होता. त्याच वेळी आलेल्या पुराच्या प्रचंड लाटेत संपूर्ण इमारत काही सेकंदात वाहून गेली. दुर्घटनेचा अंगावर काटा आणणारा व्हिडिओही समोर आला आहे.
सद्गुरू यांनी सांगितले की, “सकाळी ९:०५ वाजता या ८० भाविकांच्या गटाचे प्रमुख ईशांग प्रवीण यांचा संदेश आला होता की ते इमिग्रेशन सेंटरमध्ये पोहोचले आहेत. मात्र, ९:१४ वाजता ही दुर्घटना घडली. त्यानंतर त्यांचा कोणताही संपर्क होऊ शकलेला नाही.” ईशांग प्रवीण हे गेल्या दोन दशकांपासून संस्थेशी जोडलेले आहेत, हे सांगताना सद्गुरूंना हुंदका अनावर झाला.
नेपाळमध्ये ३०० हून अधिक भारतीय बेपत्ता
नेपाळ आणि तिबेट सीमेवर झालेल्या या जलप्रलयात आतापर्यंत १७० हून अधिक जणांचा मृत्यू झाला असून १,५०० हून अधिक नागरिक बेपत्ता आहेत. नेपाळच्या परराष्ट्र मंत्र्यांनी दिलेल्या माहितीनुसार, बेपत्ता लोकांमध्ये ३०० हून अधिक भारतीय पर्यटकांचा समावेश आहे. यात तमिळनाडूतून गेलेल्या ३७ पर्यटकांचाही समावेश आहे. पुरामुळे रस्ते, पूल आणि दळणवळणाची साधने पूर्णपणे उद्ध्वस्त झाली आहेत.
मदतकार्यासाठी तातडीने परवानगीची मागणी
आपत्तीचे भीषण स्वरूप पाहता सद्गुरू यांनी स्वतः घटनास्थळी पोहोचण्याचा प्रयत्न केला, परंतु सर्व मार्ग बंद असल्याने ते पोहोचू शकले नाहीत.
“विनाशाची तीव्रता पाहता परिस्थिती अतिशय चिंताजनक आहे. आम्ही भारत, चीन आणि अमेरिकन दूतावासांशी संपर्क साधत आहोत. मला आणि माझ्या टीमला तातडीने किरोंग भागात जाण्याची परवानगी मिळावी, जेणेकरून आम्ही मदत आणि बचावकार्यात सहकार्य करू शकू,” असे आवाहन सद्गुरूंनी केले आहे.
सध्या तिबेटमधील ईशा फाऊंडेशनच्या शिबिरात अत्यंत शोकाकुल वातावरण असून बेपत्ता भाविकांच्या सुरक्षिततेसाठी प्रार्थना केली जात आहे.
