इस्रोच्या बंगळुरू मुख्यालयाला बॉम्बने उडवण्याची धमकी; सुरक्षा यंत्रणांकडून संपूर्ण परिसर रिकामा

डॉग स्क्वॉड आणि बॉम्बशोधक पथकाकडून कसून तपासणी

इस्रोच्या मुख्यालयाला धमकीचा ईमेल मिळताच सुरक्षा यंत्रणांची मोठी धावपळ उडाली. घटनेचे गांभीर्य ओळखून स्थानिक पोलीस, श्वान पथक (Dog Squad) आणि बॉम्बशोधक व नासधूस विरोधी पथकाने (BDDS) तात्काळ इस्रो मुख्यालय गाठले. सुरक्षेचा उपाय म्हणून तात्काळ सर्व शास्त्रज्ञ आणि कर्मचाऱ्यांना इमारतीबाहेर सुरक्षितस्थळी हलवण्यात आले. त्यानंतर सुरक्षा पथकांनी संपूर्ण परिसराची कोनाकोपरा न कोनाकोपरा तपासला.

धमकीचा ईमेल ठरला ‘फेक’

या संपूर्ण शोधमोहिमेबाबत माहिती देताना वरिष्ठ पोलीस अधिकाऱ्यांनी सांगितले की, “धमकीचा ईमेल आल्यानंतर आम्ही कोणतीही जोखीम न पत्करता तात्काळ शोधमोहीम राबवली. मात्र, संपूर्ण तपासणीत आवारात कोणतीही संशयास्पद किंवा स्फोटक वस्तू सापडलेली नाही. त्यामुळे हा धमकीचा ईमेल खोटा असल्याचे स्पष्ट झाले असून नागरिकांनी किंवा कर्मचाऱ्यांनी घाबरून जाण्याचे कारण नाही.”

पोलिसांकडून अज्ञात व्यक्तीचा शोध सुरू

दरम्यान, इस्रोसारख्या संवेदनशील संस्थेला धमकी देणारा हा ईमेल नेमका कुठून आला आणि तो कोणी पाठवला, याचा शोध आता पोलिसांनी सुरू केला आहे. बंगळुरूमधील ‘संजय नगर’ पोलीस ठाण्यात याप्रकरणी गुन्हा दाखल करण्यात आला असून, सायबर पोलिसांच्या मदतीने ईमेलचा आयपी ॲड्रेस (IP Address) आणि इतर तांत्रिक बाबींची पडताळणी केली जात आहे. देशपातळीवर नामांकित असलेल्या संस्थेला अशाप्रकारे लक्ष्य केल्यामुळे पोलीस या प्रकरणाचा अत्यंत गांभीर्याने तपास करत आहेत.