Video: दिल्लीत निवडणूक आयोगाविरोधात आंदोलन; माजी मुख्यमंत्री आतिशी, सौरभ भारद्वाज यांच्यासह ५०० जण पोलिसांच्या ताब्यात

मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आज राजधानी दिल्लीतील जंतरमंतरवर मोठा राजकीय संग्राम पाहायला मिळाला. ‘कॉकरोच जनता पार्टी’ (CJP) सह विविध विरोधी पक्षांच्या आव्हानानंतर आंदोलक जंतरमंतरवर जमा झाले होते. मात्र, दिल्ली पोलिसांनी आंदोलनाला परवानगी नाकारत अवघ्या काही मिनिटांतच संपूर्ण परिसर रिकामा केला. या संदर्भातील वृत्त ‘द इंडियन एक्स्प्रेस’ या वृत्तसंस्थेने दिले आहे.

या कारवाईदरम्यान आम आदमी पार्टीचे (AAP) ज्येष्ठ नेते सौरभ भारद्वाज यांच्यासह अनेक कार्यकर्त्यांना पोलिसांनी ताब्यात घेतले आहे. जंतरमंतरवर कडक नाकेबंदी केल्यानंतरही आंदोलकांचे गट जनपथ आणि टॉलस्टॉय मार्ग परिसरात घोषणाबाजी करताना दिसून आले.

पोलिसांचा मोठा बंदोबस्त; ५,००० जवान तैनात

मतदार यादीच्या विशेष पुनरीक्षण (SIR) प्रक्रियेतील गैरव्यवहारांच्या विरोधात हे आंदोलन पुकारण्यात आले होते. सुरक्षेचे कारण देत दिल्ली पोलिसांनी या आंदोलनाला परवानगी नाकारली होती. खबरदारीचा उपाय म्हणून मध्य दिल्लीत सुमारे ५,००० सुरक्षा कर्मचारी, जलद कार्यदल (RAF) आणि निमलष्करी दलाच्या तुकड्या तैनात करण्यात आल्या आहेत.

माजी मुख्यमंत्री आतिशी, योगेंद्र यादवांसह ५०० जण पोलिसांच्या ताब्यात

मुख्य निवडणूक आयुक्त ज्ञानेश कुमार यांनी काही निर्णय मनमानीपणे घेतल्याची बातमी समोर आली आणि त्यानंतर देशभरात एकच खळबळ उडाली. त्यामुळे ज्ञानेश कुमारांच्या राजीनाम्याची मागणी विरोधकांकडून करण्यात येत आहे. या पार्श्वभूमीवर आज दिल्लीत निवडणूक आयोगाविरोधात आंदोलन करण्यात आलं आहे. निवडणूक आयोगाविरोधातील दिल्लीतील निदर्शनांदरम्यान दिल्लीच्या माजी मुख्यमंत्री आतिशी, तसेच कार्यकर्ते योगेंद्र यादव आणि नेहा बोरा यांच्यासह ५०० जणांना पोलिसांनी ताब्यात घेतलं आहे.

नेमका विवाद काय?

गेल्या महिन्यात ‘द इंडियन एक्स्प्रेस’ या वृत्तपत्राने निवडणूक आयोगाच्या कामकाजाबाबत एक बातमी प्रसिद्ध केली होती. या अहवालानंतर निवडणूक आयोगाच्या पारदर्शकतेवर प्रश्न उपस्थित करत विरोधकांनी मुख्य निवडणूक आयुक्त ज्ञानेश कुमार यांच्या तातडीच्या राजीनाम्याची मागणी लावून धरली आहे.

सौरभ भारद्वाज यांची प्रशासनावर टीका

आंदोलनस्थळी पोहोचण्यापूर्वी आणि ताब्यात घेण्याआधी माध्यमांशी बोलताना सौरभ भारद्वाज यांनी केंद्र सरकारवर जोरदार निशाणा साधला. आपण सर्वसामान्यांप्रमाणे मेट्रो आणि रिक्षाचा वापर करून जंतरमंतरवर पोहोचल्याचे सांगत त्यांनी नागरिकांना लोकशाही वाचवण्यासाठी पुढे येण्याचे आवाहन केले.

“शांततापूर्ण मार्गाने आंदोलन करणे हा आमचा घटनात्मक अधिकार आहे. आम्ही ६ दिवसांपूर्वीच या आंदोलनासाठी परवानगी मागितली होती. परंतु, सरकारविरोधी आवाज दाबण्यासाठी पोलिसांनी परवानगी नाकारली,” असा आरोप भारद्वाज यांनी केला.

दिल्लीत वाहतूक कोंडी आणि ११ मेट्रो स्टेशन बंद

सुरक्षेच्या कारणास्तव दिल्ली प्रशासनाने जंतरमंतर, संसद मार्ग, जनपथ आणि केजी मार्ग परिसरातील वाहतुकीवर मोठे निर्बंध लादले आहेत. याशिवाय, खबरदारीचा उपाय म्हणून दिल्ली मेट्रोच्या ११ प्रमुख स्टेशनचे प्रवेश आणि निकास द्वार (Entry/Exit Gates) तात्पुरते बंद ठेवण्यात आले आहेत. यात राजीव चौक, केंद्रीय सचिवालय, मंडी हाऊस आणि पटेल चौक या महत्त्वाच्या स्टेशन्सचा समावेश आहे.

जंतरमंतरवरून पोलिसांच्या कारवाईनंतर पांगलेले काही आंदोलक आता जनपथ आणि टॉलस्टॉय मार्गाच्या दिशेने एकत्र येत असल्याचे चित्र असून परिसरात प्रचंड पोलीस बंदोबस्त तैनात करण्यात आला आहे.