पीटीआय, श्रीनगर : काश्मीर खोरे आणखी गारठले आहे. श्रीनगरमध्ये रविवारी रात्री पारा उणे ३.४ अंश सेल्सियसपर्यंत घसरला. आतापर्यंत हंगामातील ही सर्वात थंड रात्र ठरली. काश्मीरमध्ये इतरत्रही पारा गोठणबिंदूच्या खाली गेला असल्याचे अधिकाऱ्यांनी सोमवारी सांगितले. रविवारी रात्री श्रीनगरमधील किमान तापमान या हंगामातील सामान्य तापमानापेक्षा २.५ अंशांनी कमी होते. गोठणबिंदूखालील तापमानासाठी प्रसिद्ध उत्तर काश्मीरच्या बारामुल्ला जिल्ह्यातील गुलमर्गच्या प्रसिद्ध ‘स्की रिसॉर्ट’पेक्षाही श्रीनगरमधील तापमान कमी होते. गुलमर्गमध्ये किमान तापमान उणे ३.२ अंश नोंदवले गेले. दक्षिण काश्मीरच्या अनंतनाग जिल्ह्यातील पहलगाम पर्यटक ‘रिसॉर्ट’मध्ये उणे ४.४ अंश सेल्सिअस तापमान नोंदवले. काश्मीर खोऱ्याचे प्रवेशद्वाराचे शहर काझीगुंड येथे किमान तापमान उणे ३.४ अंश होते. दक्षिणेकडील कोकरनाग शहरातही किमान तापमान उणे १.४ अंश होते. उत्तर काश्मीरमधील कुपवाडा येथे उणे २.७ अंश तापमानाची नोंद झाली, अशी माहिती अधिकाऱ्यांनी दिली. हवामान विभागाच्या कार्यालयाने सांगितले, की हवामान कोरडे राहण्याची शक्यता असली तरी ८ डिसेंबपर्यंत धुके कायम राहणार आहे. ९ डिसेंबरपासून जम्मू-काश्मीर आणि लगतच्या भागांवर पश्चिमेत नव्याने निर्माण झालेल्या विक्षोभाचा परिणाम होण्याची शक्यता आहे. तर, मैदानी व सखल भागात हलकी हिमवृष्टी व मध्यम व उंच भागात हलकी हिमवृष्टी होईल. दोन दिवस या भागात हलक्या ते मध्यम हिमवृष्टीची शक्यता आहे.
