पूर्वाश्रमीच्या पत्नीची हत्या करण्यासाठी गेलेल्या व्यक्तीने मास्कमुळे भलत्याच महिलेवर चाकूने हल्ला केल्याची घटना समोर आली आहे. आरोपीने पत्नीऐवजी अनोळखी महिलेवर चाकूने वार केले. केरळमधील कोझिकोडे जिल्ह्यात ही घटना घडली आहे. महिलेला रुग्णालयात दाखल करण्यात आलं असून तिच्यावर उपचार सुरु आहेत.

बिजू असं या आरोपी पतीचं नाव असून पत्नीची हत्या करण्यासाठी तो को-ऑपरेटिव्ह बँकेत घुसला होता. यावेळी त्याने एका भलत्याच महिलेला पत्नी समजून तिच्यावर चाकूने वार केले. ही महिला बँकेतील दुसरी कर्मचारी असल्याचं नंतर उघड झालं.

पोलिसांनी दिलेल्या माहितीनुसार, दुपारी २ वाजता ही घटना घडली असून आरोपीला ताब्यात घेतलं आहे. आरोपीने ज्या महिलेवर हल्ला केली ती महिला त्याची पत्नी बसते त्या जागी बसली होती असंही त्यांनी सांगितलं. बिजू हा कोझिकोडेमधील रहिवासी असून दोन वर्षांपूर्वी पत्नीपासून वेगळा झाला होता. जखमी महिलेवर सध्या उपचार सुरु आहे.