Tamil Nadu Kerala Election Result Updates: डीएमके पक्षाचे प्रमुख व तमिळनाडूचे मुख्यमंत्री एमके स्टॅलिन यांचा ८७०० मतांनी पराभव, विजय यांच्या उमेदवाराने दिला शह

एकीकडे द्रमुक (DMK) प्रमुख आणि तमिळनाडूचे मुख्यमंत्री एम. के. स्टॅलिन यांना त्यांच्या हक्काच्या कोलाथूर मतदारसंघात पराभवाचा धक्का बसला असताना, त्यांचे पुत्र आणि उपमुख्यमंत्री उदयनिधी स्टॅलिन यांच्या चेपॉक मतदारसंघातून महत्त्वाचा कल समोर येत आहेत. भारतीय निवडणूक आयोगाच्या माहितीनुसार, उदयनिधी स्टॅलिन यांनी ७,००० हून अधिक मतांची आघाडी घेतली असून टीव्हीकेचे (TVK) सेलवम सध्या पिछाडीवर आहेत.

Tamil Nadu Assembly Election Results 2026 Live Updates: भारतीय निवडणूक आयोगाच्या आकडेवारीनुसार, डीएमके पक्षाचे सर्वेसर्वा व तामिळनाडूचे मुख्यमंत्री एम के स्टॅलिन यांचा कोलाथूर मतदारसंघात पराभव झाला आहे. अभिनेते विजय यांच्या तमिळगा वेत्री कळघम पक्षाचे उमेदवार व्ही. एस. बाबू यांचा विजय झाला आहे. व्ही. एस. बाबू यांनी ८२९९७ मते मिळवली. स्टॅलिन यांचा ८७०० मतांनी पराभव झाला आहे.

Kerala Assembly Election Results 2026 Live Updates: खऱ्या अर्थाने निर्णायक कौल दिल्याबद्दल केरळमधील बंधु-भगिनींचे आभार; प्रचार तसेच चांगला लढा दिल्याबद्दल यूडीएफच्या नेत्यांचे व कार्यकर्त्यांचे अभिनंदन, मी आधीच म्हटल्याप्रमाणे केरळमध्ये क्षमता आहे, केरळमध्ये गुणवत्ता आहे. आता केरळमध्ये यूडीएफचे सरकार असेल. मी लवकरच माझ्या केरळम कुटुंबाच्या भेटीला येणार आहे, असे राहुल गांधी यांनी म्हटले आहे.

Tamil Nadu Assembly Elections Result 2026 Live Updates: तमिळनाडूत विधानसभेच्या एकूण २३४ जागा आहेत. बहुमतासाठी ११८ जागांवर जिंकणे आवश्यक आहे. अभिनेते विजय यांच्या तमिळगा वेत्री कळघम (TVK) पक्षाला १०९ जागांवर आघाडी मिळाली आहे. विजय यांचा पक्ष बहुमताजवळ पोहोचत आला आहे. तर तमिळनाडूतील मुख्य विरोधी पक्ष असलेल्या अण्णाद्रमुक (एआयएडीएमके – AIADMK) पक्ष ५२ जागांवर आघाडीवर आहे. तर मुख्यमंत्री एमके स्टॅलिन यांच्या सत्ताधारी द्रमुक (डीएमके – DMK) पक्षाला ७२ जागांवर आघाडी मिळाली आहे. विजय यांचा तामिळनाडूच्या राजकारणात उदय झाला आहे.

Kerala Assembly Elections Result 2026 Live Updates: केरळ विधानसभेच्या एकूण १४० जागा असून बहुमतासाठी ७० जागा जिंकणे आवश्यक आहे. सत्ताधारी माकप प्रणित लेफ्ट डेमोक्रेटिक फ्रंट (एलडीएफ) व विरोधक काँग्रेस प्रणित यूनायटेड डेमोक्रेटिक फ्रंट (यूडीएफ) या दोन आघाड्यांमध्ये मुख्य लढत झाली. देशात फक्त केरळमध्ये माकपची सत्ता होती. परंतु, या निवडणुकीत काँग्रेसने माकपला धक्का दिला आहे. केरळमध्ये काँग्रेस प्रणित यूडीएफची सत्ता स्थापन होणार असल्याचे निश्चित झाले आहे. मुख्यमंत्री पिनराई विजयन यांच्या नेतृत्वातील एलडीएफला फक्त ३४ जागांवर आघाडी मिळाली आहे. तर यूडीएफने बहुमताचा आकडा पार केला आहे. यूडीएफला ९१ जागांवर आघाडी मिळाली आहे. तर इतर पक्षांना १५ जागांवर आघाडी मिळाली.

तमिळनाडूत अभिनेते विजय यांच्या पक्षाची बहुमताकडे वाटचाल सुरू आहे. विजय यांनी टीव्हीके अर्थात तमिळगा वेत्री कळघम पक्षाची स्थापना दोन वर्षांपूर्वी केली होती. दोन वर्षांतच सत्तेपर्यंत पोहोचणारे ते दुसरे नेते ठरले आहेत. या आधी एन. टी. रामा राव यांनी तेलुगु देसम पक्षाची स्थापना केल्यानंतर दोन वर्षांतच सत्तेपर्यंत पोहचण्याचा विक्रम रचला होता. त्यानंतर असे करणारे विजय हे दुसरे नेते ठरले आहेत. तामिळनाडूचे माजी मुख्यमंत्री एम.जी. रामचंद्रन यांनी १९७२ मध्ये एआयएडीएमके पक्षाची स्थापना केली होती. त्यानंतर त्यांना १९७७ मध्ये सत्तेची सुत्रे हाती मिळाली.

Kerala Election Results 2026 Live Updates: केरळमध्ये भाजपाने तीन जागांवर विजय मिळवला आहे. भाजपाचे उमेदवार आणि माजी केंद्रीय मंत्री व्ही. मुरलीधरन यांनी सीपीआय-एमचे विद्यमान आमदार कडकमपल्ली सुरेंद्रन यांचा पराभव केला आहे. कझाकुट्टम मतदारसंघातून ते निवडणूक लढवत होते. तर इतर दोन ठिकाणी भाजपा उमेदवारांनी डाव्या उमेदवारांचा पराभव केला आहे. केरळमध्ये काँग्रेस प्रणित यूडीएफने एकूण १४० जागांपैकी १०२ जागांवर आघाडी घेतली आहे. त्यामुळे त्यांचा सत्ता स्थापनेचा मार्ग मोकळा होण्याची शक्यता आहे.

https://twitter.com/MilagroMovies/status/2051192495061840373?s=20

Tamil Nadu Election Results 2026 Live Updates: लोकसभा व राज्यांच्या विधानसभांमध्ये महिलांना ३३ टक्के आरक्षण देण्यासाठी भाजपा सरकारने १३१ व्या घटनादुरूस्तीचे विधेयक संसदेत मांडले होते. लोकसभेच्या जागा वाढवण्याचा भाजपा सरकारचा विचार होता. त्याला तमिळनाडूतील डीएमके पक्षाने कडाडून विरोध केला होता. तामिळनाडू विधानसभा निवडणुकीच्या प्रचारात डीएमकेने हा मुद्दा लावून धरला होता. मतदारसंघांची पुनर्रचना करून भाजपा त्यांच्या सोईने मतदारसंघांची पुनर्रचना करेल, अशी शंका डीएमके तसेच इतर विरोधी पक्षांनी व्यक्त केली होती. हा मुद्दा तामिळनाडूच्या राजकारणात चालला नसल्याचे दिसून येते.

Tamil Nadu Election Results 2026 Live Updates: तमिळनाडूतील सत्ताधारी पक्ष असलेल्या डीएमकेने भाजपावर मागील काही महिन्यांत जोरदार टीका केली होती. डीएमके पक्षाला तमिळनाडूत मोठा झटका बसला आहे. अभिनय क्षेत्रातून राजकारणात आलेले थलपती विजय यांच्या टीव्हीके पक्षाने तमिळनाडूत मुसंडी मारली आहे. त्यांचा पक्ष तमिळनाडूतील सर्वात मोठा पक्ष म्हणून उदयाला आला आहे. एम.जी. रामचंद्रन, जे. जयललिता यांच्या पाऊलांवर पाऊल ठेवत विजय हे सिनेक्षेत्रातून राजकारणात दाखल झाले. एम. करूणानिधी हे देखील सिनेमाची स्क्रिप्ट लिहित असत. पुद्दुचेरीत भाजपा प्रणित एनडीए सत्तेत पुन्हा येण्याच्या मार्गावर आहे.

तामिळनाडू भाजपाचे प्रदेशाध्यक्ष नैनार नागेंद्रन, माजी राज्यपाल तमिलसाई सुंदरराजन आणि केंद्रीय मंत्री एल. मुरूगन हे पिछाडीवर आहेत. डीएमके व टीव्हीके पक्षाचे उमेदवार आघाडीवर आहेत. भाजपाच्या दिग्गजांची प्रतिष्ठा पणाला लागली असून ते सध्या पिछाडीवर आहेत.

तमिळनाडूत टीव्हीके व डीएमके पक्षात चुरस रंगलेली असताना काँग्रेस मात्र मागे पडली आहे. तामिळनाडू काँग्रेसचे प्रदेशाध्यक्ष के. सेल्वापेरूंथगाई हे पिछाडीवर आहेत. टीव्हीकेचे उमेदवार थेन्नारासू यांनी १४०८६ मतांनी आघाडी घेतली आहे. श्रीपेरुंबुदूर मतदारसंघात ही लढत झाली होती.

Tamil Nadu Assembly Election Results 2026 Live Updates: "थलपती विजय यांच्या बाजूने ही प्रचंड मोठी भावनिक लाट होती, यातून विजय यांच्याबद्दल लोकांमध्ये असलेले प्रेम दिसून आले. लोक थलपती विजय यांच्याबरोबर अत्यंत भावनिकरित्या जुळलेले आहेत", असे तमिळनाडूतील विजय यांच्या टीव्हीके पक्षाचे उमेदवार कनिमोझी संतोष यांनी म्हटले आहे.