दहशतवाद्याला केस गळतीची ‘दहशत’, श्रीनगरमध्ये दाखल होताच थेट हेअर ट्रान्सप्लांटसाठी घेतली धाव!

मोहम्मद उस्मान जट उर्फ ‘चायनीज’ असे या अटक करण्यात आलेल्या दहशतवाद्याचे नाव आहे. गेल्या महिन्यात श्रीनगर पोलिसांनी त्याला बेकायदेशीरित्या भारतात घुसखोरी करताना अटक केली होती. राष्ट्रीय तपास यंत्रणेच्या (NIA) अधिकाऱ्यांनी केलेल्या चौकशीत त्याने अनेक गुपिते उघड केली आहेत. जम्मू-काश्मीरबाहेर लश्करचे स्लीपर सेल नेटवर्क तयार करून भारतात मोठे दहशतवादी हल्ले घडवून आणण्याची जबाबदारी त्याच्यावर सोपवण्यात आली होती.

काश्मीरमध्ये आल्यावर बदलले विचार!

मूठभर दहशतवादी नेत्यांच्या चिथावणीखोर भाषणांना बळी पडून भारतात आलेल्या या दहशतवाद्याचे विचार काश्मीरमधील सामान्य नागरिकांचे शांततापूर्ण जीवन पाहून बदलले. लाहोरचा रहिवासी असलेल्या उस्मान जटने सांगितले की, “काश्मीरमधील लोकांचे दैनंदिन जीवन आणि तेथील वास्तव डोळ्यांसमोर आल्यानंतर माझे उद्दिष्ट पूर्णपणे बदलले.” “गेल्या अनेक वर्षांपासून माझे केस वेगाने गळत होते. टक्कल पडल्यामुळे माझा आत्मविश्वास पार खचला होता. मी हेअर ट्रान्सप्लांटबद्दल आधी ऐकले होते, पण ही महागडी उपचार पद्धती फक्त पाश्चात्य देशांमध्येच उपलब्ध असते, असा माझा समज होता,” अशी कबुली उस्मानने तपास अधिकाऱ्यांसमोर दिली.

सलून चालकाच्या मदतीने ‘हेअर ट्रान्सप्लांट’

श्रीनगरच्या डोंगराळ भागात मुक्कामादरम्यान उस्मानची ओळख झरगम आणि अब्दुल्ला उर्फ ‘अबू हुरायरा’ या दोन पाकिस्तानी दहशतवाद्यांशी झाली. यातील झरगमने उस्मानला श्रीनगरमधील एका दुकानात (सलून) नेले. तिथल्या दुकानदाराशी बोलताना उस्मानला समजले की, त्या दुकानदाराने स्वतः हेअर ट्रान्सप्लांट केले आहे. यानंतर उस्मानने त्या दुकानदाराशी जवळीक वाढवली आणि त्याला स्वतःच्या हेअर ट्रान्सप्लांटसाठी मदत करण्यास तयार केले. अखेर लश्करच्या या दहशतवाद्याला श्रीनगरमधील एका नामांकित क्लिनिकमध्ये नेण्यात आले, जिथे त्याच्या डोक्यावर यशस्वी शस्त्रक्रिया करून केस रोपण करण्यात आले.

पंजाबमध्ये लपून पाहत होता तुर्की मालिका

हेअर ट्रान्सप्लांटची प्रक्रिया पूर्ण झाल्यानंतर उस्मान जट आणि अबू हुरायरा एका खाजगी वाहनाने जम्मूमध्ये आले. तिथून त्यांनी पंजाबमधील मालेरकोटला येथे जाण्यासाठी स्लीपर बस पकडली. पंजाबमध्ये असताना उस्मान एका घरात लपून राहत होता. या काळात तो आपला वेळ घालवण्यासाठी टीव्हीवर ‘तुर्की शो’ (Turkish shows) पाहायचा आणि इंग्रजी भाषा शिकण्याचा प्रयत्न करत होता, अशी माहिती अधिकाऱ्यांनी दिली.

बनावट भारतीय कागदपत्रांच्या आधारे परदेशात पळण्याचा होता डाव

तपासात समोर आलेल्या माहितीनुसार, उस्मान जटला भारतातून सुरक्षितपणे पळ काढायचा होता. त्यासाठी त्याला भारताचे अस्सल वाटावे असे बनावट पॅन कार्ड (PAN card), ओळखपत्र आणि पासपोर्ट मिळवायचा होता. लश्करचाच दुसरा एक दहशतवादी उमर उर्फ ‘ससा’ (Khargosh) याच्या पावलावर पाऊल ठेवून उस्मानचा हा कट सुरू होता. कराचीचा रहिवासी असलेला उमर २०१२ नंतर भारतात घुसला होता. त्याने २०२४ मध्ये राजस्थानच्या जयपूरमधून बनावट पासपोर्ट मिळवला आणि तो इंडोनेशियाला पळून जाण्यात यशस्वी ठरला. तिथून दुसऱ्या बनावट ट्रॅव्हल डॉक्युमेंट्सच्या आधारे तो एका आखाती देशात स्थायिक झाल्याचा संशय आहे.

लश्कर-ए-तैयबाच्या आंतरराज्य नेटवर्कचा पर्दाफाश

लश्कर-ए-तैयबाच्या या आंतरराज्य मॉड्यूलचा पर्दाफाश होणे हा सुरक्षा दलांसाठी मोठा विजय मानला जात आहे. यापूर्वी नोव्हेंबर २०२५ मध्ये श्रीनगर पोलिसांनी ‘अल फलाह मॉड्यूल’चा पर्दाफाश केला होता. या नेटवर्कमध्ये उच्चशिक्षित व्यावसायिक आणि प्रामुख्याने डॉक्टरांचा समावेश होता, ज्यांचे ब्रेनवॉश करून त्यांना दहशतवादी कारवायांमध्ये ओढले गेले होते. या मॉड्यूलचा मुख्य आरोपी अल फलाह युनिव्हर्सिटीचा डॉ. उमर-उन नबी हा होता. गेल्या वर्षी १० नोव्हेंबर रोजी दिल्लीतील ऐतिहासिक लाल किल्ल्याबाहेर झालेल्या कार बॉम्बस्फोटामागे त्याचाच हात होता, ज्यामध्ये अनेक निष्पाप नागरिकांना आपला जीव गमवावा लागला होता. सध्या एनआयए आणि स्थानिक पोलीस या संपूर्ण नेटवर्कची कसून चौकशी करत आहेत.