नवी दिल्ली : लेफ्टनंट जनरल बी. एस. राजू यांची लष्कराचे नवे उपप्रमुख म्हणून नियुक्ती करण्यात आली आहे. १ मे रोजी ते कार्यभार स्वीकारतील. सध्याचे लष्कराचे उपप्रमुख असलेल्या लेफ्टनंट जनरल मनोज पांडे यांची लष्करप्रमुख पदावर नियुक्ती करण्यात आल्याने राजू यांची या पदावर नियुक्ती करण्यात आली आहे. सध्या बी. एस. राजू हे लष्करी मोहिमांचे महासंचालक आहेत. विजापूर येथील सैनिकी शाळेत आणि राष्ट्रीय संरक्षण प्रबोधिनीमध्ये लष्करी प्रशिक्षण घेतलेले लेफ्ट. ज. राजू हे निष्णात हेलिकॉप्टर पायलट आहेत. १५ डिसेंबर १९८४ रोजी त्यांनी जाट रेजिमेंटमधून आपल्या लष्करी कारकीर्दीला सुरुवात केली. आपल्या ३८ वर्षांच्या लष्करी कारकीर्दीत त्यांनी अनेक महत्त्वाच्या जबाबदाऱ्या पार पाडल्या आहेत.